Hulyo 21,2021 — Sa pagsaulog og 47th Nutrition Month, nagpahigayon ang City Nutrition Committee og health monitoring ug gift-giving alang sa mga nakompermang Severe Acute Malnourished (SAM) Children sa siyudad sa Panabo.

Ang 12 ka SAM Children sa Panabo City gihatagan sa lokal nga panggamhanan og libreng tambal, bitamina, ug check-up. Tumong niini ang mamonitor ang kahimtang sa mga bata ug maatiman ang kakulangang sa ilang nutrisyon.

Mailhan ang bata nga nag-edad og unom (6) ka bulan hangtod lima (5) ka tuig nga usa ka SAM kung aduna siyay pinakaubos nga weight-for-height, adunay sinyales sa bilateral pitting oedema, o very low mid-upper arm circumference. Sa kasamtangan, anaa nay na 12 ka kaso ka mga SAM children ang nakumpirma sa siyudad.

Gawas niini, nagpahigayon og counseling sa mga ginikanan aron masigurado ug mapadali ang pagbawi sa kahimsog sa mga bata.

Sumala pa ni CHO Nutritionist-Dietitian Lovella Y. Fontanilla nga ilang ginapaningkamotan nga mahatag nila ang mga bata og ilang gikinahanglang suporta sa ilang panglawas. Dugang pa niya, “Kung malnourished sila, ang ilang immune system (kay) nagababa. Maong dali lang sila matakdan og sakit.”

Mapasalamaton ang ginikanan nga si Pauline N. Sinahan diin nakabenepisyo iyang anak sa maong programa. Iyang saad sa iyang kaugalingon: “Isip ginikanan, ako gyud sundon ang ilang giingon sa akoa kay para gihapon ni sa kaayohan sa akong anak.”

Si City Nutrition Action Officer ug City Councilor, Hon. Janno Paolo Gentiles, nagdugang og panghatag og regalo alang sa mga SAM Children.

Sa kalihokan, gisubay ang Minimum Public Health Standards nga mando sa DOH batok sa COVID-19.

| Sonny L. Calizar, CIO – PIRO
📸 | Rommel Cayas