Giturn-over na sa 50 ka ginikanan gikan sa nagkandaiyang barangay sa Panabo City ang DOLE-assisted Livelihood Project nga mokantidad og P1 Million adtong Hulyo 19,2021 sa ABC Hall, Panabo City. Sila ang mga ginikanan nga adunay minor de edad (17 anyos ug paubos) nga mga anak nga nagatrabaho aron makatabang sa pamilya o ginatawag nga mga “Child Laborer”. Ang DOLE-assisted Livelihood Project makatabang sa pagnegosyo o dugang kapital sa mga ginikanan nga benepisyaryo aron motutok nalang ilang mga anak sa pag-eskwela. Makadawat ang kada ginikanan og P20,000.00.

Ang pagpili sa mga ginikanan mi agi og matarong nga pagsusi sa Department of Labor and Employment (DOLE). Gisiguro nila nga wala na ang mga bata sa mga kompanya nga ilang ginatrabahoan ug wala na sila gatrabaho. Saysay pa ni DOLE Community Facilitator, Dave Andre A. Villegas, nga “Human sa tulo (3) ka bulan hantod unom (6) ka bulan sa verification ug validation dapat na withdraw na ang mga bata. Dili najud sila involved sa child labor.”

Ang mga ginikanan gihatagan usab og seminar sa DOLE alang sa ilang hapsay nga pagpadagan sa ilang panginabuhian. Sa mensahe ni DOLE Provincial Head Angelina A.Talingting sa mga benepisyaryo, “Naningkamot kami na mahatag na sa inyo ang maong tabang aron makasugod kamo sa inyong panginabuhian.” Nagpaabot usab si Talingting sa iyang pasalamat kay City Mayor Jose E.Relampagos sa pagkugi, pagpaningkamot, ug pagsupporta sa mga katawhan sa Panabo nga mahatagan sila sa maong tabang.

Tubag ni City Mayor Jose E. Relampagos kanila nga andam siya motabang sa mga katawhan sa Panabo ilabi na nga nagsagubang ang tanan sa pandemya. Dugang pa niya, “Dako akong kalipay nga madawat na ninyo ang livelihood assistance aron makasugod na kamo sa pagnegosyo ug nanghinaot ako na inyo kining ampingan og palambuon, dili alang kanamo apan alang sa inyong pamilya ilabi na sa inyong mga anak.”

Ang Public Employment and Services Office (PESO) ang gihatagan og responsibilidad nga magmonitor kanila ug magsuta kung sakto ang ilang pagpadagan sa ilang panginabuhian nga pagasugdan sa pagpalambo.

Duyog sa kalihokan, anaa sila PESO Manager Cherelle B. Espinosa, CSWDO Department Head Chareina Joy G. Lacuin, ug PESO Manpower Development Assistant Mitch D. Ramos.

|IDOB
📸|FGJP