Giaprobahan na ni Presidente Rodrigo Duterte ang usa ka balaod nga naglakip sa mga kawani sa media ug ubang mga indibidwal nga gitugotang magdala og armas tungod sa ilang propesyon. Kini usab nagpataas sa validity sa lisensya sa pagpanag-iya, pagparehistro, ug pagtugot sa pagdala og armas gawas sa pinuy-anan o lugar sa negosyo.

Ang Republic Act No. 11766, nga gipirmahan ni Duterte niadtong Mayo 6, 2022 nagpataas sa validity sa lisensya sa pagpanag-iya og armas ug bala gikan sa duha (2) ka tuig ngadto sa lima (5) o 10 ka tuig, nga nag-amendar sa RA 10591 o ang Comprehensive Firearms and Ammunition Regulation Act.

Ang dili pagsunod sa balaod moresulta sa pagbawi sa lisensya. Dugang niini, ang pagkapakyas sa pag-renew sa mga lisensya sa pagdala ug pagrehistro sa mga armas moresulta sa pagkompiska sa lisensya ug pagrehistro. Ang pagkapakyas sa lisensyado sa pag-renew sa lisensya o pagparehistro sa duha ka higayon moresulta sa perpetual disqualification gikan sa pag-apply alang sa bisan unsang lisensya sa armas.

Ang RA 11766 nag-ingon usab nga ang mga tawo nga gikonsidera nga “under imminent danger by nature of their profession, occupation, or business” exempted sa pagkuha og threat assessment certificate isip usa sa mga rekisitos sa pagkuha o pag-renew sa lisensya sa armas.

Apil niini ang mga abogado, accountant, media practitioner, cashier ug bank teller, pari, ministro, rabbi, imam, doktor ug nars, enhinyero, negosyante nga naladlad sa taas nga risgo nga mahimong target sa mga kriminal nga elemento, napili nga incumbent ug kanhing mga opisyal; ug mga aktibo ug retiradong sundalo ug pulis.

Ang mga aplikasyon alang sa renewal sa lisensya o rehistrasyon kinahanglang ubos sa Firearms and Explosives Office sa Philippine National Police sulod sa unom ka bulan sa dili pa ang expiration date sa mga lisensya o registration.

Ang PNP maoy moporma sa implementing rules and regulations sa bag-ong balaod sulod sa 90 ka adlaw sa pagka-epektibo niini.

|Tim Acebedo, CIO-PIRO
📸 F. Paculanang, CIO-MULTIMEDIA