Nakatukod na og usa ka sari-sari store sa Barangay Nicolas si Nathaniel Gamol human siya nakabenepisyo sa Balik Probinsiya (BP2) Program sa Department of Social Welfare and Development. Gawas sa tindahan, aduna na pud siyay gulayan nga gina amuma.

Si Gamol usa ka taga-Panabo nga nagtrabaho pagka driver sa Luzon. Nakaundang siya og trabaho tungod sa striktong kwarantina sa ilang lugar. Tungod niana, nidangop siya sa DSWD sa lugar kung asa siya gikan aron makauli na siya sa Panabo City.

Pinaagi sa Provincial Social Welfare and Development Office sa Davao Del Norte, nasubay sa probinsiyal nga panggamhanan ang kinabuhi karon sa mga benepisyaryo sa Balik Probinsiya Program sama kay Gamol. Himoan kini nila og dokumentaryo aron ipakita unsa ka dakong tabang ang Balik Probinsiya.

Sa pag interview sa Information team sa probinsya sa Davao Del Norte kay Panabo City Administrator Pedrito A.Misoles, ingon niya nga ilang isiguro nga kanunayon ang commitment ni Mayor Jose E.Relampagos sa mosunod pa nga taga Panabo na maka benepisyo sa BP2 Program.

Matod pa ni Gamol, “Gi rolling ko ang kwarta og mi palit ko og (Refrigerator) para sa softdrinks nako nga baligya.” Nagpasalamat siya sa gobyerno ug sa ubang ahenysa nga nagtinabangay aron siya maka uli sa probinsya sa Davao del Norte ug matagaan og tabang alang sa pang adlaw-adlaw nga panginabuhi.

Ang dokumentaryo sa kinabuhi karon ni Gamol magrepresenta sa Probinsya sa Davao del Norte sa Balik Probinsya, Bagong Pag-asa Program ni Presidente Rodrigo Roa Duterte.

Sa pagbisita, anaa ang Provincial SWDO Social Welfare Officer II Lanny L. Guinit, mga personahe sa Provincial Information Communication Knowledge and Management Office,ug City Administrator Pedrito A.Misoles.

Gen Alforque – CIO
📸 – A. Castilla