Septyembre 13, 2022 — Gisiguro sa lokal nga panggamhanan sa Panabo City nga masunod ang mga balaod sulod sa panahon sa pandemiya labi na ang minimum public health standards (MPHS) nga gipatuman sa national IATF. Sa direktiba ni Presidente Marcos Jr. pinaagi sa Executive Order 03, gihimo nang “optional” o boluntaryo ang pagsuot og face mask sa gawas sa mga establisyamento. Pamaagi kini aron nga matabangan ang ekonomiya sa nasod nga naglisod og saka sa milabayng tuig.

Bisan man nga boluntaryo ang pagsuot og face mask sa gawas, gisaysay gihapon sa EO 3 nga gikinahanglan gihapon magsuot ang mga tao nga anaa sa delikadong estado sa panlawas. Usa kini sa mga buot nga ipadangat ni Panabo City Acting City Health Officer Dr. Eranie L. Pangilinan sa katawhan.

“Highly encouraged gihapon nga mosuot og face mask labi na kung immunocompromised, buntis, o senior citizen,” ingon pa niya. “Isa ni sa pinakasimple nga buhaton aron malikayan nga matakdan og COVID.”

Sa milabay nga bulan, naghinay-hinay usab og saka ang mga kaso sa COVID-19 sa siyudad gikan sa pipila ka mga simana nga zero cases. Saysay pa ni Pangilinan, “Naa gihapon ang COVID. Maong dili gihapon dapat magkompyansa.” Sa kasamtangan, anaa na sa 30 ka mga active cases ang siyudad.

Sa laing bahin, sulti pa ni PNP Panabo Chief PLTCOL Adelon Caacbay nga mosunod lang sila sa mandato ug kaalam sa Presidente. “We in the PNP, we follow the chain of command. We will abide in the wisdom of the higher authority, for we know it is for the good of the people.”
Ang Executive Order 03 ang usa sa mga lakang ni Presidente Marcos nga maluag ang nasud sulod sa pandemiya. Hagbay na usab nga gi-implementa sa ubang mga nasud ang boluntaryong pagsuot og face mask apan wala pa’y natala nga grabeng pagtaas sa COVID.

Gikinahanglan gihapon nga ang pagsuot og face mask sa sulod sa establisyamento.

🖋 CIO | 📸 Erick Etis| 🎨Eman Pan