Sulod sa duha ka tuig ni City Mayor Jose E.Relampagos, anaa na sa 80 porsyento ang mga kalsada o “City Roads” sa siyudad sa Panabo ang nasementohan. Base kini sa datos ni City Engineer Bernardo C.Rabanoz, Jr. nga gibutyag sa iyang interview sa RaJOE Serbisyo 94.3 FM.

Dugang pa sa City Engineer, matagamtaman sa tuig 2022 ang “Road Connectivity” nga pangandoy ni Mayor Relampagos para sa siyudad aron matabangan ang mga mag-uuma nga mapadali ang paghatod sa mga produktong ani. Mao kini ang pagsemento sa kalsada gikan sa mga barangay Malativas, Katualan o San Roque, ug Sta. Cruz padulong sa poblacion. Sa kasamtangan, pipila nalang ka kalsada ang wala na sementohan ug ginaproseso na ang mga dokumento niini.

“Karong tuiga, challenging sa among office tungod sa daghan proyekto,” matod pa ni Engineer Rabanoz. “Mo agi pa og survey, consultation sa ubang barangay. Human nami ana nga phase. Diri nami sa program of works.”
Iyang panlantaw nga sa ikaduhang termino ni Mayor Relampagos, atimanon nasad ang mga drainage system nga maoy solusyon sa pagbaha ug ang husto nga pag-agos sa tubig. Dako usab kini og trabaho kanila tungod gikinahanglan kini og pakig-alayon sa mga komyunidad ug sa mga tag-iya sa mga apektado nga mga luna.
Kabahin sa problema sa lubak nga kalsada sa national highway (Tadeco Road), giklaro ni Engr. Rabanoz nga responsibilidad sa Department of Public Works and Highways (DPWH) ang pag-atiman sa national highway. Apan, kapila na gibalik-balikan ni Mayor Relampagos ang DPWH aron mapadali ang pagtubag sa mga mulo sa katawhan. Ang City Government of Panabo apil sa ginahimong konsultasyon sa DPWH kabahin sa kalsada. Gibutyag usab ni Engr. Rabanoz nga apil sila sa monitoring sa proyekto sa DPWH.

Alang sa dugang nga detalye, tanawa ang full interview ni Engr. Rabanoz sa https://fb.watch/6ylT98rAIG/

📸|IDOB