Gisugdan na ang operation sa ikaduhang vaccination site sa Panabo City nga nahimutang sa Davao del Norte State College (DNSC) adtong Hulyo 29,2021. Napili ang DNSC Court tungod aduna kini igong lugar para sa mga magpabakuna.

Matod pa ni Assistant City Heath Officer Dr. Eranie L. Pangilinan nga kinahanglan ang second vaccination site tungod nagadaghan na ang gusto magpabakuna. Target sa CHO nga makabakuna og 1,000 ka mga residente sa Panabo kada adlaw. Dungag pa ni Dr. Pangilinan, “Hopefully na ma-fullfil jud namo na ma-hit namo ang target permi para paspas pud nato ma-achieve ang herd immunity.”

Sa unang adlaw, nakita ang pagdagsa sa mga interesadong magpabakuna. Adunay mga pag-ayos sa waiting area sa vaccination site aron dili magkagoot ang katawhan ug malandongan sila og tarong. Sa ikaduhang adlaw, gamiton na ang tapad nga Gym isip waiting area.

“Though aduna lang tay short period of time for preparation pero nabuhat gihapon namo ang dapat na i-prepare,” matod pa ni Mafel Mugas, RN, CHO National Immunization Program Coordinator. Ang mga personahe sa City Health Office kauban ang mga personahe sa DNSC nagpasigurado nga han-ay ug limpyo ang lugar sa pagbakuna.

Janssen by Johnson and Johnson ang bakuna nga gihatag sa CHO. Si Marilyn D. Guardarama, usa sa napailalom sa A3 category, miingon nga “Maayo man ang among pagpavaccine. Okay ra pud ang area ug maayo pud ang pag-abiabi nila sa amoa.”

Gawas sa vaccination sites, anaa usab ang Mobile Vaccination Team nga nagabakuna sa mga lagyong barangay sa siyudad.

Padayon gihapon sa pagbakuna alang sa mga senior citizens (A2), persons with comorbidity (A3), ug mga frontline personnel in essential sector (A4) sa siyudad sa Panabo.

Mamahimong mobisita sa Barangay Health Stations para sa pagrehistro ug maghuwat sa tawag o text sa schedule bag-o muadto sa mga vaccinations sites.

| Sonny L. Calizar, CIO – PIRO
📸 | Emman Pan , CIO – Multimedia