Gipahamtang sa Barangay San Pedro Gym ug Nanyo Gym ang pagpanghatag sa mga school supplies sa day care pupils sa Central ug North Districts. Kini inisyatibo sa City Social Welfare and Development Office sa pagpanguna ni Department Head Chareina Joy G. Lacuin ilalom sa programang “Tuloy-Aral Kaagapay sa Pag-aaral for the Day Care Children”.

Gibutyag ni Day Care program Focal Person Melvina A. Domingo, “Ang makabenefit sa pagpagpanghatag mao ang mga enrolled day care pupils sa 40 ka barangay sa siyudad nga nagpangidaron og kwatro anyos hantod singko anyos.” Gibudgetan sa maong programa ang kapin 3,000 ka mga enrolled day care pupils.

Usa sa naka benepisyo sa pagpanghatag nga lumulupyo sa Barangay San Pedro mao si Glory Grace Dolor kauban iyang anak na si Daniel Jay Dolor.

“Ako nagpasalamat sa local nga panggamhanan sa paghatag og school supplies sa akong anak kay bisan walay face-to face nga klase, magamit gihapon niya kini,” butyag ni Dolor.

Dako usab ang pagpasalamat ni Ellaine Jayne S. Cabunoc nga lumulupyo sa Purok Okra Barangay Nanyo. Ingon pa niya, “Bisan adunay pandemiya, padayon gihapon ang ilang pagpanghatag sa mga school supplies nga hilabing dakong tabang sa akong anak.”

Sa pagpanghatag sa school supplies, naa ang presensya ni Executive Secretary Josie Mary G. Relampagos isip representante ni City Mayor Jose E. Relampagos, Vice Mayor Janrey G. Gavina diin naghatag usab og face masks sa mga ginikanan sa day care pupils.

Anaa sad sina City Councilor Hon. Flopone Royle A.Catalan nga naghatag og mga seedlings sa klase-klaseng gulay. Si City Councilor Hon. Emmanuel G. Pamisaran nag hatag og ice drop sa mga day care pupils. Nisalmot sad si City Councilor Hon Emeterio E. Blase sa maong programa.

Gipahamtang niadtong Setyembre 2, 2020 ang pagpanghatag sa Central District ug Setyembre 3, 2020 sa North District.

Laoman usab sa Setyembre 4, 2020 ipahigayon sa Barangay Mabunao Gym ang pagpanghatag sa mga school supplies sa South district day care pupils.

| Mel Hilario, CIO-PIRO.
📸 M Gentiles