Marso 12, 2022 – Makalingaw nga kalihokan alang sa mga magtutudlo sa DepEd Night gisaulog subay sa selebrasyon 21st Araw ng Panabo nga gipahigayon sa Panabo Gymnasium.

Sa gipahitabong kalingawan, adunay kompetisyon nga gipasundayagan sa mga maestra ug maestro sa nagkalain-laing mga tulonghaan sa Panabo.

Dili masukod ang kalipay sa mga magtutudlo kay nahatagan sila og higayon nga mapakita ilang mga talento sa sayaw ug kanta. Anaa usab gipahitabong pagrampa sa mga sanina nga gibuhat gamit ang ‘recyclable materials’ aron ipasigarbo ang ka ‘creative’ sa nagkadaiyang skwelahan nga gimugna mismo sa mga estudyante sa Senior High School.

Ani pa ni Schools Division Superintendent Doc. Reynante A. Solitario CESO VI, “Our teachers are just in their respective schools nga nagapaningkamot para sa ilang mga estudyante, but we are so blessed and lucky that we were invited to have a DepEd Night, makagawas nagyod mi”. Dugang pa niya, maningkamot sila kanunay nga mamahimong Panalo ang edukasyon sa Panabo.

Mihatag usab og mensahe si City Mayor Jose E. Relampagos nga nanghinaot nga nalingaw ang mga magtutudlo sa gipahitabong DepEd Night. Ani pa niya, “Nindot ang giandam sa DepEd nga kalingawan karong gab-ihona, unta malingaw ang tanan dili lang sa DepEd Night kundi sa tanang aktibidadis sa Araw ng Panabo karong tuiga.”

Anaa usab si Tony Labrusca ug Milyahe Band nga nakigduyog sa kalihokan aron maghatag og dugang lingaw sa mga magtutudlo ug sa tanang panaboans.

Anaa sa kalihokan sila City Administrator Pedrito A. Misoles, City Councilors Emeterio Blase ug Janno Paolo Gentiles, ABC President Conrad Theodore Matutino, Assistant Schools Division Superintendent Phoebe Gay L. Refamonte, Division DLDM Coordinator Armando O. Aguilon Jr., mga teaching and non-teaching personnels sa DepEd.

✍️| Tim Acebedo, CIO-PIRO
📸 | Rommel Cayas