Pebrero 4, 2022 – Gihisgutan sa programang RaJoe Serbisyo sa 94.3 FM ang Forest Land Use Plan (FLUP) kauban si EMS II Recson Engalgado diin kini ang lima (5) ka tuig nga plano sa lokal nga panggamhanan aron matabangan ang kinaiyahan sa siyudad sa Panabo ilabi na ang kalasangan. Ubos kini sa Executive Order No. 318 Promoting Sustainable Forest Management in the Philippines, ang Local Government Units (LGUs) gimanduan nga iapil ang FLUP ngadto sa tagsa-tagsa ka Comprehensive Land Use Plan (CLUP).

Ang FLUP naglantaw sa usa ka limpyo ug progresibo nga palibot. Tinguha niini nga palamboon ug mapreserba ang nahabilin nga ‘Forest and Forestlands’ (FFL) nga mga dapit pinaagi sa malungtarong pagdumala sa mga programa ug proyekto alang sa agroforestry system, urban re-greening ug paghimo sa mga lokal nga ordinansa sa pagprotekta sa kinaiyahan.

Ani pa ni Engalgado, nga ang mga positibong epekto sa FLUP sa katawhan kay makahatag kini og proteksyon sa mga kalamidad sama sa pagbaha ug makahatag kini og ‘economic activities sama sa pagpromote sa ecotourism sa syudad. “Makahatag usab kini og limpyo nga hangin ug limpyo nga suplay sa tubig kay mas protektado na ang kinaiyahan nato”, dugang niya.

Dugang niini, pinaagi sa mga programa ug aktibidadis sa FLUP, maghimo og rehabilitasyon ug ‘reforestation’ sa kalasangan apil napud ang mga ‘riverbanks’ kung diin nagpokus kini sa pagdugang og pagpananom sa mga ‘mangrove’.

Lakip sa lima (5) ka tuig nga pinansyal ug pamuhunan nga mga kinahanglanon alang sa pagpatuman sa FLUP kay aron mapadali ug mapakusog ang ‘holistic development’ ug pagpataas sa kahimtang ug kalidad sa kinabuhi sa mga katawhan sulod sa mga lugar sa kalasangan. Ang pinansyal nga kinahanglanon sa pagpatuman sa FLUP gikan 2021-2026 kay mokantid og P38,050,000.00.

Miingon usab si Engalgado, nga kung anaay mga ahensya o Non-Government Organizations (NGO) nga gusto motabang sa pagprotekta sa kinaiyahan, andam motabang ang City Environment and Natural Resources Office (CENRO) aron mas mapakusgan pa ang tinguha sa maong butang. Mohatag ang CENRO og lugar mga pwede tamnan ug sila libreng mohatag og ‘Malibago seedlings’ alang sa ilang pagtabang og pagpananom.
Ang mga kalihokan nga may kalabotan sa FLUP kay sama sa pagsuporta sa panginabuhian sa mga komunidad sa kabukiran, pagpalambo sa ‘ecotourism’ sulod sa forestland, ug pagpalig-on sa mga lokal nga organisadong grupo.

Prayoridad usab sa FLUP sa tuig 2022 kay ang rehabilitasyon sa FFL ilabi na ang mga mangrove ug ang pagprotekta sa mga sapa aron malikayan ang kusog nga pagbaha.

Alang sa kompletong detalye sa panaghisgot kabahin sa FLUP, mamahimong i-click ang link https://fb.watch/aYDgrTDZsU/

✍ | Tim Acebedo, CIO-PIRO