Nag-abri na sa unang higayon ang Tibungol Elementary School sa adlawng Abril 19, 2022 sa kasamtangang ginapahitabo na limited face to face classes. Ang Tibungol ES ang nagsilbing fifth batch na nagbalik sa klase sa siyudad. Adunay 45 ka mga estudyante gikan Kinder hangtod Grade 3 ang misalmot sa maong kalihokan.

Ang tulonghaan giila isip Garden School tungod sa iyahang magarbong palibot, han-ay na tanom, ug bakilid na yuta na midala og kanindot sa lugar. Dugang niini, naapruba ang tulonghaan sa mga rekisitos na gihatag gikan sa lokal na IATF, DepEd Panabo, ug Lokal nga Panggamhanan gumikan sa school sanitation, lugar, safety protocol, hangtod sa gimugna nga mga polisiya.

Dili ikalimod ang pagkamadasigon na nakita sa mga estudyante human sila nakasinati sa pagbalik na usab sa klase. Wala nahimong babag ang pakigbisog sa dalan padulong sa tulonghaan kay mas gihatagan og bili ang magtuon.

“Kabalo ta how we struggle to get here in Tibungol Elementary School. Dili siya sayon kay muagi pa ka og sapa ug layo gyud siya. But I welcome you all today especially to the students on our opening of limited face to face classes,” butyag ni school head Oscar Galbez Pales. Nanghinaot pa usab si Pales na mas magkugi ang tanan alang sa kalamboan sa kaugalingon. “We do not want the future of education na magkaroon ng hindi tamang daan. The teachers will guide the students to know and understand their potential na mas mapakinabangan pa.”

Si Josie N. Giangan, usa ka ginikanan, nagpaabot sa iyang kalipay atol sa kalihokan, “Excited ko isip ginikanan kay ang pagtuon sa bata mas detalyado na ug mas masabtan. Lahi ra gyud basta teacher na ang magtudlo. Nagpasalamat ko kay napili among eskwelahan na mag-abri sa klase ug mas mag-improve gyud ang ilang pagtuon.”

Nakigduyog pa usab sa seremonyas ang mga personahe sa DepEd Division na sila Luzviminda Dulay ug Maria Nenita G. Tuazon, AO Floirendo ES school head Marivic Gloria, mga ginikanan, ug mga magtutudlo sa tulonghaan.

l M. Lagura
Photos: A. Castilla