Abril 21,2021 — Giturn-over na sa Department of Labor and Employment (DOLE) XI ang livelihood cash assistance alang sa mga ginikanan sa unom (6) ka mga rescued child laborers sa sulod sa opisina ni City Mayor Jose E.Relampagos. Gawas sa cash assistance, mihatag ang DOLE og food packages ug gihimo sad silang benepisyaryo sa TUPAD Program. Tumong niini nga matabangan ang mga ginikanan sa pagtukod og negosyo alang sa pagsuporta sa ilang mga anak ug pamilya.

Sumala pa ni DOLE XI Director II Atty. Jason P Blais nga mamahimong palamboon pa sa mga ginikanan ang livelihood assistance nga gihatag sa DOLE aron dili na mapugos og trabaho ilang mga kabatan-onan. “Ang gihatag sa DOLE unta makatabang ni sa inyoha sa unsa man ang inyong sitwasyon ug hinaot ang kanang kapital nga gihatag sa inyoha kay inyong mapalago alang sa iyong panginabuhian.”

Nagpasalamat usab si Lorna L. Rafaila, usa ka grantee sa DOLE, sa gihatag na opportunidad alang kanila. Iyaha kuno kining gamitong pangkapital sa candle-making nga negosyo. “Isip usa ka ginikanan, paningkamotan nako nga mapalambo ang akong negosyo na candle making pangsuporta sa akong anak.”

Mahinumduman nga ang mga child laborers girescue sa DOLE XI ug sa Lokal nga Panggamhanan sa Panabo gikan sa usa ka kompanya pinaagi sa gibuhat na DOLE inspection sa siyudad adtong Pebrero 03,2021.

Ang kalihokan gitambungan nila DOLE Director II Atty. Jason P. Balais, DOLE Provincial Director Angelina A. Talingting, DOLE Labor Emplyment Officer Lalaine M. Apuya, DOLE Community Facilitator Child Labor and Livelihood Program Dave Andrie Villegas kauban si City Administrator Pedrito A. Misoles, Executive Assistant III ni Mayor Jose E.Relampagos na si Jo-anne R.Capuyan, Senior Labor and Employment Officer Cherelle B. Espinosa, ug ni City Information Officer Michael Angelo A.Resueño.

Alang sa uban pang detalye, mamahimong mubisita sa Public Employment Service Office nga nahimutang sa Parks and Plaza, Brgy. New Pandan, Panabo City.

| Sonny L. Calizar, CIO – PIRO