Talagsaon ang gipakita nga pamatasan ni Rex D. Lonzaga nga taga Barangay San Vicente human niya mauli ang usa ka mobile phone nga nabilin sa iyahang pedicab. Tungod sa iyang gipakita, gigawaran siya og Honesty Award ni City Mayor Jose E.Relampagos pinaagi sa usa ka plaque of recognition, token, ug cash gift gikan sa iyang personal nga pundo.

Ang tag-iya mao iyang pasahero nga si Joanah Reign Cornelio nga taga Barangay Dapco. Gibutyag ni Cornelio nga dako ang iyang pasalamat kay Lonzaga tungod ang iyang cellphone mao iyang ginagamit para makastorya sa iyang inahan nga anaa sa abroad.

Sumala pa ni Lonzaga, “Prinsipyo nako nga pag dili akoa ang gamit, akoa jud nang i-uli.” Siya mismo ang mi surrender sa cellphone sa buhatan sa City Administrator’s Office ug wala usab niya damha nga siya mapasidunggan sa LGU Panabo. “Na amaze ko kay wala ko kabalo nga naay ingon ani nga programa si Mayor Relampagos,” dugang pa niya.

Nagpahimangno si City Mayor Relampagos sa mga katawhan nga mahimong matinud-anon tungod mao kini ang makapalipay sa Dios ug makapalimpyo sa konsensya sa usa ka indibidwal. Ang paghatag sa award gipangunahan ni Executive Secretary Josie Mary G.Relampagos.

GeneRose Alforque – CIO/PIRO
📸 – Quinn Villahermosa