Pebrero 2, 2022 – Opisyal nang giturn-over sa ARN Builders sa Lokal nga Panggamhanan sa Panabo, pinaagi kay City Mayor Jose E. Relampagos, ang 10.3-hectare Sanitary Landfill Facility nga nikantidad og P82.9 Million. Ang Sanitary Landfill usa ka pasilidad para sa paglabay og “residual waste” nga gitugot ubos sa Republic Act 9003 o ang Ecological Solid Waste Management Act of 2000 ug sa Panabo City Ordinance No. 28 of 2005. Nahimutang kini sa sa Purok 5, Barangay Waterfall.

Aduna kini usa ka Administrative Building, Watch Tower, Material Recovery Facility, Weighing Bridge, Wash Bay, Waste Disposal Cell/Pit, Waste Water Treatment Facility, Drainage, ug Guard House.

Butyag pa ni City Environment and Natural Resources Office (CENRO) Department Head nga si Engr. Felix Jonases Senajon, nagpasalamat siya nga natukod na ang Sanitary Landfill sa siyudad aron matabangan ang katawhan sa pag-atiman sa ilang basura. “21 years in the making kini, maong nalipay ko nga natukod ug magamit na kini puhon,” butyag ni CENRO Head Senajon.

Pinaagi sa bagong pasilidad, masiguro ang pagpakunhod sa mga kadaot gikan sa natipon nga basura. Kini usa ka alternatibong pagdasok sa mga basura sama sa mabulok, dili mabulok, ug ma recycle pa. Kana tanan tabonan og yuta, idasok pag-ayo aron mas mugahi kini nga makatabang sa luwas ug madali nga decomposition. Ingon pa sa environmental experts, ang Sanitary Landfill mas luwas kaysa Open Dumping Site.

Saysay pa ni City Mayor Jose E. Relampagos sa iyang mensahe nga dili na pabayaron ang matag barangay kung ihatod ang mga basura nila sa pasilidad kay serbisyo kini sa katawhan. Ingon pa niya, “Magtibangay lang kitang mga opisyales sa Lokal nga Panggamhanan alang sa tanan ug ako kanunay mangita og programa para sa kalamboan.”

Aduna pud Blessing ug Ribbon Cutting sa maong pasilidad nga gipangunahan ni Rev. Fr. Dioscoro R. Saniel, Priest Incharge sa Christ the King Kauswagan.

Sa maong seremonyas, anaa sila city councilors Hon. Janno Paolo Gentiles ug Hon. Emeterio Blase, ABC President Conrad Theodore Matutino, City Administrator Pedrito A. Misoles, Panabo Chief of Police PLTCL Atty. Verna L. Cabuhat, EMB XI SWF Staff Engr. Mark Vergel Borja, Executive Secretary Josie Mary Relampagos, 1Lt. Jaymar O. Pamittan sa 89th IB, Arnel Espinosa sa ARN Builders, mga Department Heads, ug mga staff sa CENRO.

✍️ | Tim Acebedo, CIO-PIRO
📸 | Romel Cayas, CIO-MULTIMEDIA