Nitabang ang Panabo City Veterinary Section (CVS) sa pagluwas sa iro nga naigo og “indian pana” sa Barangay Tibungco, Davao City adtong Hulyo 31,2021. Sa pagpanguna ni Panabo City Veterinarian Dr. John Rey Bautista, ilang gitanggal ang bala sa pana nga naigo sa kilid sa tiyan sa iro.

Matod pa sa Facebook post ni Sonia Tata William, usa ka Animal Welfare Advocate, nga iyang nakit-an ang tag-iya nga nagapangayo og tabang sa iyang iro nga gipana sa wala mailhi nga mga tawo. Dili daw usab kuno kaya mapa operahan ang iro sa mga pribadong veterinary tungod sa kawad-ong pinansyal sa tag-iya.

Si William, kauban si Police Corporal Abegail Ugoban nga isa usab ka Animal Welfare Advocate sa Bunawan Police Station, nangayo og tabang sa Panabo City Veterinary Section diin giaksyonan dayon kini adtong adlawng Agosto 4,2021.

Sumala pa ni Dr. Bautista nga posibleng maging kritikal ang kahimtang sa iro tungod sa impeksyon nga dala sa pana maong dayon kining gioperahan. Ingon pa niya, “Isa sa among mga advocacy is to uphold the welfare of these animals. So willing mi motabang kutob sa among makaya bisan pa man sa mga dili taga Panabo.”

Pahinumdom usab ni Dr. Bautista nga mamahimong ireport sa Animal Welfare Desk o sa mga pulis kung adunay makit-an nga mga hayop nga biktima sa animal cruelty. Mamahimo usab ireport sa mga himpilan ang mga tag-iya sa mga hayop nga ginasakit ug ginapasagdan ang ilang mga alagang hayop.

Mapasalamaton si William, Ugoban, ug ang tag-iya sa iro kay walay gipangayo nga bayad ang PCVS sa pag-opera. Gidawat gihapon nila kini bisan pa ang biktima nga iro kay gikan sa laing distrito..

Sa kasamtangan, ginaobserbahan ang kahimtang sa iro ug padayon kini sa pagpaayo.

| Tim Acebedo, CIO-PIRO
📸 | Sonia Tata William