Agosto 2, 2022 – Nakighinabi sa City Information Office si Acting City Health Officer Dr. Eranie Pangilinan pinaagi sa programang Rajoe Serbisyo sa 94.3 FM ang mga programa batok dengue mahitungod natala nila nga adunay “surge” sa mga suspected cases sa dengue ang nahitabo sa siyudad hilabi na sa panahon sa ting-ulan. Sa iyang impormasyon, adunay 295 cases gikan sa 17 ka barangay sa Panabo sugod sa bulan sa enero kompara sa 184 ka kaso sa milabay nga tuig.

Mas gipalapdan karon sa CHO ang kampanya sa pagpakgang sa pagtaas sa kaso sa Dengue hilabi na nga anaa pa sa tunga sa tuig. Mahinumduman nga nagpatawag si Mayor Jose E. Relampogos og meeting sa CHO ug sa mga barangay captains sa siyudad aron pagahisgutan ang mga resolusyon sa matag barangay sa maong problema tungod kanila magsugod ang mga lakang.

Gi-awhag ni Pangilinan nga mag sugod mismo sa isig ka panimalay ang pagpugong sa sakit pinaagi sa 4 O’clock habit o ang pagpanghinlo sa palibot sa susamang pamaagi nga mapugngan ang pag pangitlog sa mga lamok.”Community participation gyud sya, tinabangay gyud,” ingon pa niya.

Ang Dengue Fever usa ka viral infection nga gikan sa paak sa lamok nga adunay dengue virus o mga “Aedes Aegypti mosquitoes”.

Base usab sa nahitabong briefing sa City Anti Dengue Operations adlawng martes Agosto 2, 2022, pagasugdan na ang kampanya kontra dengue kauban ang City Disaster Risk Reduction Management Office (CDDRMO), Bureau of Fire Protection (BFP), ug Philippine Coast Guard (PCG) karong Agosto 11, 2022. Prayoridad usab nila ang 17 ka mga barangay nga taas ang mga kaso.

|📝, Gen Alforque – CIO, Research Unit