Nakab-ot na sa 791 ka mga Alternative Learning System (ALS) learners ang ilang pangandoy nga magpadayon ug mahuman sa ilang pag-eskwela sa gipahitabong ALS Graduation and Moving-Up Ceremony adtong Agosto 2, 2022. Ang mga learners nakatapos na sa elementary ug junior high school levels.

Ang ALS usa ka programa ilawom sa Department of Education (DepEd) alang sa mga wala nakatapos sa ilang pag-eskwela o mga out-of-school youth and adult (OSYA). Gipahigayon ilang Graduation and Moving-up Ceremony Class of 2021 sa Panabo City Gym kauban sila City Mayor Jose E. Relampagos ug City Vice Mayor Gregorio U. Dujali, III.

Una kini nga Graduation and Moving-up Ceremony alang sa ALS sulod sa nahitabong pandemiya. Ingon pa ni Education Program Supervisor Jaime Carlom nga, “Malipayon ko nga sila nilahutay. Wala sila nagmaluya. Naa silay ka isog nga nihuman sa elementary ug junior high school education.”

“Among ampo kanila nga mopadayon gihapon aron makab-ot pa nila ilang mga damgo. Dili lang para sa ilang kaugalingon kondili apil ang mga pangadoy sa ilang mahal sa kinabuhi,” dugang ni Carlom. “Mapasalamaton ko sa suppurta sa atong LGU Panabo City ug sa tanan stakeholders.”

Sa pulong ni City Mayor Jose E. Relampagos, importante kaniya ang paghatod sa lessons ngadto sa mga learners. Iyaha usab giingon nga apil sa iyang plano ang suporta sa mga miyembro sa 9th City Council. Dugang pa niya, “Ako gyud i-challenge atong mga ALS teachers nga atong i-edukar atong mga estudyante. Inyong amahan sa siyudad nagplano nga dagdagan inyong sweldo kay gusto nako ma edukar ang katawhan sa Panabo.”

Sa ilang pagradwar, nakompleto nila ang basic requirements nga gihatag sa Bureau of Alternative Education (BAE) apil na usab ang pagpaningkamot sa mga magtutudlo sa ALS nga matanyag sa mga learners ang angay nilang matun-an. Ang mga ALS Learners ang nagpamatuod nga dili babag ang kalisod ilabi na sa pinansyal na sila magpadayon sa pagkab-ot sa ilang mga tinguha sa pagpa-uswag ug pagpalambo sa ilang mga tagsa-tagsa nga kaugalingon.

Sa maong kalihokan, mitambong usab sila City Administrator Pedrito Misoles, City Councilors nga sila Hon. Janno Gentiles ug Hon. Omar Ranain, OIC Director IV of the Bureau of Alternative Education Marilette Almayda, DepEd Region Xl ALS Focal Person Maricel S. Langahid, Schools Division Superintendent Raynante A. Solitario edD, CESO Vl, ASDS Phoebe Gay L. Refamonte, Chief Education Supervisor-CID Janwario E. Yamota, PRO F-IMAC Cesar Cuyugan, AOF Foundation Representative Jessrel Baldos, PMU Head Melchi Uyasan, PESO Manager Cherelle B. Espinosa, DepEd public school division supervisors, education program supervisors, ug barangay captains.

| CIO
with contributions by Blezei G. Maquiso, CIO-SPES
📸 Rommel Cayas, CIO-Multimedia