Usa ka tawag ang nadawat sa Panabo PNP Station adtong Agosto 15, 2021, alas 3:00 sa hapon gikan sa Regional Tactical Operation Center (RTOC) nga nagpahibalo sa kapulisan sa Panabo nga adunay ambulansyang na carnap ug gina gukod sa kapulisan sa Davao padulong Panabo City. Ang maong sakyanan usa ka ambulansya sa Bansalan, Davao del Sur.

Matod pa sa Driver sa Ambulansya nga si Junell Magsanay Santos, 33 anyos, nga samtang gisulod niya iyang pasyente sa Emergency Room sa Southern Philippines Medical Center (SPMC), kalit lamang kini gisakyan sa usa ka indibidwal nga ginganlan og Jun Canono. Dugang niya nga maayo na lamang adunay standby nga patrol sa lugar og mao kini ang nag “hot pursuit” sa sakyanan.

Abtik dayon nga miresponde sa tawag ang PNP Panabo ug ila kini gi atangan sa check point sa Barangay JP Laurel, Panabo City. Nahibaloan nga gibaril sa kapulisan ang ligid sa sakyanan kay hapit niya ma bangaan ang personahe sa Task Force Davao.

Sa pag doul sa kapulisan sa Panabo, nakita nila nga adunay samad ang suspetsado. Dali siyang gi dala sa Panabo Out-Patient Department (Dating Emergency Clinic) ug narefer ngadto sa Southern Philippines Medical Center (SPMC).

Padayon gihapon ang pag-imbestiga sa kapulisan sa suspect. Anaa karon ang kinawat na ambulansya sa PNP Panabo Station.

| Genevieve R. Alforque, CIO-PIRO
📸 PNP PANABO