Nagpahigayon og benchmarking activity ang baynte-kwatro (24) ka mga opisyales ug personahe sa Lokal nga Panggamhanan sa Lamitan City nga gikan sa Probinsya sa Basilan didto sa Panabo Sanitary Landfill Facility (SLF) niadtong Enero 28, 2023.

Ang SLF sa Panabo adunay luna nga kapin 10 ektarya nga nahimutang sa Purok 5, Barangay Waterfall diin dinhi ipahimutang ug iproseso ang mga basura o “residual waste” sa syudad nga gitugot ubos sa Republic Act 9003 o ang Ecological Solid Waste Management Act of 2000 ug sa Panabo City Ordinance No. 28 of 2005.

Buot tun-an sa Lamitan City ang pagmugna ug pagdumala sa sanitary landfill sa syudad aron sila makatukod og kaugalingon nga pasilidad, diin mapalambo ang pagproseso sa solid waste o basura sa ilang lugar ug isip pagsubay sa mga requirement ug standard sa Department of Environment and Natural Resources ug uban pang ahensiya sa gobiyerno.

Gipaambit ni Assistant City ENRO Engr. Oiver Oriol ang mga importanteng impormasyon sa pagtukod og SLF lakip na ang mga proseso ug pagpadagan sa maong pasilidad.

Atol sa ilang pagbisita, sila giabi-abi ni City Administrator Pedrito Misoles kauban ang mga personahe sa City Environment and Natural Resources Office, Toursm Promotion Office, City Information Office ug uban pang opisina.

🖋Erick Etis – Multimedia Unit / CIO Panabo
📸Emman Pan – Multimedia Unit / CIO Panabo