June 01,2021 — Ilatag na sa hybrid Public Hearing ang mga senate bills kabahin sa paghimo og usa ka Metropolitan Davao Development Authority (MDDA) karong June 02,2021 sa Senate Building ug pinaagi sa usa ka Video Conference. Usa si City Mayor Jose E.Relampagos sa giimbita sa kalihokan.
Ang mga senate bills nga ginganlan og “An Act Creating the Metropolitan Davao Development Authority, Defining its Powers and Functions, and Providing Funds Therefor” gisponsor ni Senator Imee R.Marcos (SB No. 2116), Senator Ronald “Bato” Dela Rosa (SB NO. 2153), ug Senator Christopher Bong Go (SB No. 2157).
Ingon pa ni Senator Bong Go nga ang MDDA gimugna aron ma “centralize and oversee the development efforts and initiatives that deal with the challenges faced by the city of Davao and other neighboring LGUs.” (Mahimo kining sentro ug tigbantay sa mga kalamboan ug mga inisyatibo nga nag-atubang sa mga hagit sulod sa Lungsod sa Davao ug ubang pang mga kasikbit nga mga LGUs.)
Ang kasangkaran sa MDDA apil ang siyudad sa Davao, Panabo, Tagum, Samal (IGaCoS), Digos, Mati, lakip na ang mga munisipyo sa Sta. Cruz sa Davao del Sur, Carmen sa Davao del Norte, Maco sa Davao de Oro, ug Malita sa Davao Occidental.
Sa Section 5, nakalatag ang mga serbisyo sa MDDA sama sa: (1) Development Planning, (2) Transport Management, (3) Solid Waste Disposal and Management, (4) Urban Renewal, Land Use Planning, and Shelter Services, (5) Health and Sanitation, Urban Protection, and Pollution Control, ug (6) Public Safety.
Aduna usab Metropolitan Davao Development Council (MDDC) nga maoy mahimong “governing board” ug magmugna sa mga polisiya kabahin sa serbisyo sa MDDA. Ang mga miyembro niini mao ang Chairperson sa Regional Development Council, Region XI; mga gobernador sa probinsiya sa Davao Oriental, Davao de Oro, Davao del Norte, Davao del Sur, ug Davao Occiental; mga city mayors sa Davao, Mati, Tagum, Digos, IGaCoS, ug Panabo; mga municipal mayors sa Carmen, Sta. Cruz, Maco, ug Malita isip ex officio members.
Ang Chairperson sa MDDC mogikan niining grupo pinaagi sa usa ka election. Siya adunay usa ka General Manager ug tulo (3) ka assistant general managers.
Ang Public Hearing karong Miyerkules pangulohan sa Chairperson of the Committee on Local Government na si Senator Francis “Tol” N.Tolentino. Kauban usab nila ang mga miyembro sa Committee on Government Corporation and Public Enterprise.
| cio
