Nakabenepisyo ang 13 ka mga rehistradong mangunguma sa Barangay Katualan sa libreng similya sa mais ug mga abuno (OPV-white corn variety) nga gihatag sa Lokal nga Panggamhanan sa Panabo pinaagi sa City Agriculture’s Office-Corn Program adtong Hunyo 23,2021. Ang kalihokan nahitabo alang sa mga mangunguma nga anaa sa kabukiran isip tabang sa panahon sa pandemiya.

Gawas sa gihatag nga similya ug abuno, aduna usab gipahitabong technical service si Corn Program Coordinator/Gulayan sa Paaralan Program Focal, Joe Mari Pudpud, aron hatagan sila og giya sa tamang pag-atiman sa maisan.

Sumala pa ni City Agriculturist, Samuel Anay, nga naa silay programang pang-agrikultura para sa mga “food producers” sa siyudad isip supporta sa ilaha. Sumala pa niya, “Walay barangay nga ma ulahi sa paghatag og serbisyo o ayuda ilabi na sa mga food producers sa atong siyudad.”

Mapasalamaton usab si Barangay Kagawad Hon. Zainal Mazul nga natagamtaman sa ilang mga mangunguma ang maong programa. Ingon siya, “Among paningkamotan nga mapalambo ang oportunidad nga gihatag sa amoa ug unta daghan pang mangunguma ang makabenepisyo inii.”

Alang sa mga mangunguma na gusto makabenepisyo sa Corn Program, mamahimong duolon ang barangay kagawad nga nagagunit sa Committee on Agriculture sa ilang barangay.

| Sonny L. Calizar, CIO – PIRO
📸 | City Agricultures Office