Nobyembre 18, 2021 – Misalmot ang 13 ka mga youth organizations sa syudad sa Panabo aron iselebrar ang Agbay 2021 nga gipahitabo sa Panabo City Gymnasium nga adunay temang: “Panag-ilhanay, Panag-amigohay, Panaghiusahay.”

Sa unang parte sa kalihokan, adunay seminar nga gipahitabo diin gihisgutan ang mga nagkalaing-laing isyu nga gina-atubang sa mga kabatan-onan ug gihatagan usab sila og mga inspirational messages aron mas magiyahan pa sila nga mamahimong produktibong indibidwal. Ang mga speakers sa maong seminar, anaa sila Dr. Jacqueline B. De Asis, 1st Lieutenant Gen. Adrian M. Gautane, ug Quinn Villahermosa.

Sa ikaduhang parte, gipahitabo ang kontes nga Creative Halloween Attire nga gipangandam og maayo sa mga partisipante nga mga kabatan-onan. Aduna usab gipahitabo nga Panabo Youth Organization Got Talent Presentation.

Ang mga midaog sa Creative Halloween Attire kay ang mosunod:
1st Placer – NAOMI GAIL RIVERA sa Supreme Student Government
2nd Placer – IAN CHRIST NISAS sa Pag-asa Youth Association of the Philippines
3rd Placer – NATASHA GABRIELLE JALALON sa Panabo Youth Talented Artist

Ani pa ni Joshua Jempero nga miyembro sa Pag-asa Youth Association of the Philippines (PYAP), nga na-excite siya kay gihatagan ang mga kabatan-onan og higayon nga magkatapok-tapok bisan paman sa sitwasyon karon mahitungod sa pandemya. “Tungod aning Agbay 2021, ang mga kabatan-onan sa lagyong barangay nagkailhanay. Daghang salamat sa nagdumala niining celebration, hilabi na kay Sir Reynard Engada ug City Mayor Jose E. Relampagos sa kanunay nga suporta alang sa amoang mga kabatan-onan,” dugang pa niya.

Anaa sa selebrasyon sila Local Youth Development Officer In-Charge Reynard C. Engada, City Administrator Pedrito A. Misoles, ABC President Hon. Theodore Matutino, ABC Private Secretary I Arnel Montero, ug City Information Officer Michael Angelo A. Resueño isip representante ni City Mayor Jose E. Relampagos.

| Tim Acebedo, CIO-PIRO
📸 | Rommel Cayas, CIO-MULTIMEDIA