Tataw ang kabag-ohang nakita sa gipahigayong Inaugural Blessing sa Phase 1 Premiumed Market Renovation sa Barangay, Sto. Niño, Panabo City adtong Nobyembre 18, 2021. Adunay sumatotal 84 ka mga stalls ang nabalhin sa bag-ong narenovate nga premiumed market. Mokantidad ang Phase 1 renovation og P10 Million.

Usa kini ka pamaagi aron mahatagan og kahan-ay ang pwesto nga mas mapadali sa mga mamalitay. Gipatugbawan pag usab ang sanitation sa lugar aron malikayan ang basura nga posibleng makabaho o makadala og sakit.

Mahinumduman nga gisugdan ang pagbalhin sa Meat Section adtong February 15, 2021 aron masugdan ang renovation sa palengke pinaagi sa pag-una sa tiles sa salog apil ang lamesa kung asa i-display ang mga karneng ibaligya.

Gihatagan og importansya ni City Mayor Jose E. Relampagos ang kalimpyo sa lugar. Sumala pa niya, “Gi-awhag nako ang tanang mamaligyaay nga magbaton og kalimpyo sa inyong pwesto. I-mintinar nato ang kabag-ohan niini. Panahon karon sa pagtinabangay aron sa pag-asenso sa atong siyudad.”

Nagpaabot sad og pagtimbaya si Josephine Pabica, usa sa nagatinda sa meat section, “Nagpasalamat mi kay sa kadugay-dugay adunay gyud paglantaw ang gobyerno kanamo isip mamaligyaay sa palengke. Nakita among kahimtang ug naaksyunan.” Hangyo sad ni Pabica sa mga tindero nga mamahimong disiplinado ug matinud-anon sa tanang butang.

Opisyal na gi-abrihan sa publiko ang Premiumed Market Meat Section karon, Nobyembre 19, 2021 human naplastar og balhin ang mga stalls.

Anaa sa kalihokan si Rev. Fr. Raymond Suela, city Department heads Engr. Johaness P. Senajon, Atty. Chervin C. Paculanang, Dr. Joseph Raymond A. Sumabal, Joven M. Sepe, Mylene M. Hermosora, Nemesio L. Rasgo, Jr., Jan Marie G. Cafe, Madera M. Bautista, MLG, Evelyn A. Somozo, MPA, CEEMDO Assistant Department head Dulce E. Relopez ug Panabo United Meat Vendors Cooperative President Nelson Dela Cruz.

#ServicetoPanaboansServicetoGod

| M. Lagura – CIO/PIRO
📸 Emman Pan