Disyembre 06, 2022 — Ni-abot og sumatotal P 1,510,216.00 ang kantidad sa nakompiska nga illegal nga droga gikan sa na aresto nga 140 ka drug suspek sulod sa kasamtangang tuig matod pa sa 2022 Drug Apprehension Report sa PNP Panabo. Nahisgotan ang sitwasyon sa illegal nga droga sa gipahitabo nga Local Anti-Drug Plan of Action TWG meeting sa CDRRMO Center, Panabo City.

“Drug of Choice” gihapon sa mga suspek ang Shabu (o Methamphetamine hydrochloride) human ang Marijuana (o Cannabis sativa). Tungod niini, gikinahanglan ang maskomprehensibong plano aron nga mawala na ang “demand” and “supply” sa illegal nga droga.

Matod pa sa PNP, ang mga peddlers o ang mga nagadala og illegal nga droga sa siyudad kay mga dayo. Kadaghanan sa mga biktima nag edad og 26-35 anyos.

Pangusgan na ang kampanya batok droga ilabi na ang pagpanakop sa mga kalihokan sulod sa siyudad. Bisan pa man niini, niingon ang PDEA DDN nga “generally controllable” gihapon ang sitwasyon sa droga sa siyudad ug sa probinsya.

Dugang nila nga nakapabungkag sila og upat (4) ka mga drug den kauban ang PNP sukad Pebrero karong tuiga. Mao kini ang anaa sa barangay Kasilak, Malativas, Manay, ug Southern Davao.

“PDEA DDN extends its heartfelt gratitude to the LGU of Panabo City including the barangays for their unwavering support,” ingon pa ni IA Dennis Paguinto sa PDEA.

Gawas sa 40 ka mga barangay sa siyudad, 24 na ang nadeklarang drug cleared ug usa (1) ang drug free. Ang 15 ka mga nabilin nga drug affected kay mga barangay sa poblacion area.

Padayon usab ang Community Based Rehabilitation and Aftercare Program sa Panabo City alang sa mga Persons Who Used Drugs (PWUDs). Nahimo kining pamaagi nga nibaba ang numero sa mga active users ug pushers sa siyudad.

Kung aduna moy nahibaloan nga mga biktima ug suspek sa illegal nga droga, tawag lang sa hotline sa PDEA DDN 09207408587 o sa PNP Panabo 09985987104.

Sa panagtapok, anaa si City Administrator Pedrito A. Misoles, DILG City Local Government Operations Officer Yolanda Balana, Acting City Health Officer Dr. Eranie L. Pangilinan, PNP Chief Adelon Caacbay, 89th IB Commander LTC Rowel Tabas, POSS Head/CADAC Head Secretariat Roqueos L. Cimafranca, PDEA IA Dennis Paguinto, LYDO OIC Lester Bulfango, Planning Officer I Richelle Alberca, Social Welfare Officer II Samuel Eblamo, mga representante sa Panabo Multipurpose Cooperative, ug sa CADAC.

| CIO
📸 Rommel Cayas, CIO Multimedia