Setyembre 19, 2022 – Natagaan na usab ang 129 ka mga pedicabers og Motorized Tricycle Operators Permit o franchise gikan sa Opisina ni City Mayor Jose E. Relampagos pinaagi sa Business Permit and Licensing Section (BPLS) nga gipangunahan ni Licensing Officer Juliet S. Nacario. Ang pag apply ug paghatag sa mga rekisitos nagsugod atong Setyembre 12 – 16, 2022.

Gipangunahan ni Executive Secretary Josie Mary G. Relampagos isip representanti ni Mayor Relampagos ang paghatag sa mga napiling matagaan sa prankisa kauban ang mga personahe sa BPLS.

Sumala pa ni Executive Secretary Relampagos nga iyang ginahandom nga makanunayon na ang pag aproba sa Sanguniang Panglungsod sa paghatag og prankisa aron mahatag na kini sa uban pang mga pedicabers nga nanginahanglan niini. “Unta permaninte na ni atoang awarding ug madungagan pa ang ihap sa mga matagaan og franchise kay dili gusto si Mayor Relampagos nga mahimong burden ang pagka kolorum sa usa ka pedicab alang sa pagpaningkamot nila alang sa ilang mga pamilya,” dungag pa ni JM Relampagos.

Gilauman nga madungagan pa ang prankisa nga mahatag sa LGU Panabo pinaagi sa pag duso ni Mayor Joe ngadto sa Sangguniang Panglungsod Committee on Transportation Hon. Christian Dujali.

Ang kalihokan, makita live sa Panabo City Information Office facebook page ug didtoa na lamang mi tan-aw ang uban nga mi apply aron ilang ma saksihan og sila ba ang napili sa awarding.

| ✍️ – Gen Alforque, CIO – Research Unit
| 📸 – Rommel Cayas, CIO- Multimedia Unit