Mayo 11,2021 — Nangandam na ang Islam Community sa siyudad sa Panabo alang sa umaabot nga Eid Al-Fitr o ang katapusan sa Ramadan nga mahitabo sa Mayo 13, 2021 luyo sa gina implementang Modified General Community Quarantine o MGCQ.

Sumala pa ni Immam/Community Leader sa Purok Ramihan, Barangay Datu Abdul nga si Recardo Macla, “Dako kaayo among focus anang Eid al Fitr. Usa kini ka dakong adlaw alang sa Muslim People worldwide diin nagaconduct kami o nagaprepare sa pagsugat sa last day of Ramadan. Ang venue place of worship among ginaplastar sa pag-atiman aron sa paghatag og pag-ampo sa adlawng pagmantala.”

Nagsubay usab sila sa gi-implementang health protocols diin matod pa ni Ostad Macla nga kung adunay gibati ang ilang myembro sama sa ubo, sipon, ug pagkalintura, dili na sila tugotan nga mo attend sa balay ampoanan. Hugot usab na ilang gi-implenta ang pagsoot og facemask.

Dungag pa niya nga ang Eid al Fitr pamaagi nga mahatagan og mabungahon nga pakighinabi ang matag usa sa Muslim community. “Ang sagradong pag-ampo o kaning Ramadan importante kaayo nga isaulog sa mga kaigsoonang muslim aron mapalig-on ilang pagtoo ug pagkonekta sa ilang mga kaigsoonan”.

Ang Eid Al-Fitr o ginatawag nga “Festival of Breaking the Fast” usa ka special holiday sa mga Muslim community sa tibook kalibutan diin ginaselebrar kini sa ulahing adlaw sa bulan sa Ramadan.
Gipaabot pud ni Macla ang pagpasalamat kay Mayor Jose E.Relampagos sa paghatag og attensyon sa Muslim selebrasyon.

Ginalaoman ang kalinaw ug kahapsay alang sa pagselebrar sa Eid’l Fitr sa mga kaigsuonang Muslim sa siyudad sa panabo.

| Sonny L. Calizar, CIO – PIRO
📸 | Gen Alforque and Ivory Dawn Balogbog