Nagpagawas ang Department of the Interior and Local Government og Memorandum Circular No. 2021-058 alang sa mga gobernador, mayor, punong barangay, ug mga DILG directors nga limitahon o ibawal ang mga aktibidades nga maoy mahimong hinungdan nga magkalat ang 2019 coronavirus disease. Sa siyudad sa Panabo, gipa implementa mismo ang executive order ni Governor Edwin I.Jubahib nga 30% lang sa venue ang pwedeng maimbita sa mga kalihokan.

Sa Memorandum Circular, gipahinumdom ang tanang punong barangay nga mag-implementa og epektibong pamaagi nga mapugngan ang pagkalat sa 2019 coronavirus disease sama sa striktong pagmonitor ug implementa sa minimum health protocols sulod sa barangay. Dugang niini ang pag organisa og barangay COVID-19 operations center ug barangay tanod health patrol aron mabantayan, mamonitor, ug mareport ang mga public gatherings.

Kauban ang Philippine National Police ug Bureau of Fire Protection, ang mga punong barangay gimandoan nga mag inspect sa mga sports, recreation, ug leisure facilities sama sa park, gym, ug resort nga masiguro ang physical distancing sa mga katawhan. Gi-awhag nga mag-inspect sila sa adlawng sabado, dominggo, ug sa mga public holiday.

Gimando usab ang paglimita ug pagbawal sa mga public gatherings sama sa inom, sabong, fiesta, parada, beauty contests, processions, ug mga religious events, cultural festival, ug pool o water recreational activities.
Gilaoman usab ang mga barangay nga magpahibalo sa ilang emergency numbers sa publiko sanglit aduna may mass gatherings o mga nagsupak sa mga polisiya sa kwarantina.

Sa kasamtangan, ilawom ang Panabo City sa Modified General Community Quarantine apan ang mga kalihokan kailangan gihapon ipananghid sa City Government of Panabo ug sa barangay.