Gipangunahan sa Lokal nga Panggamhanan pinaagi sa City Anti-Drug Abuse Council (CADAC) ang pagsaulog sa National Drug Prevention Week 2022 diin adunay mga aktibidades nga gipahamtang sama sa inter-school basketball tournament nga gipahitabo sa Barangay Salvacion, Covered Court adtong Nobyember 17, 2022.

Ang maong basketball gilangkuban sa onse (11) ka mga tulonghaan sa siyudad sa Panabo. Alang sa Secondary Level anaa ang Francisco Adlaon Learning Institute, Inc., A.O Floirendo National High School, San Vicente National High School, Panabo Christian School, Inc., Northern Paramedical and Technological College, Inc., Maryknoll College of Panabo, Inc., North Davao Colleges, Inc., ug Kauswagan National High School. Samtang alang sa kolehiyo anaa ang North Davao Colleges, Inc., Davao del Norte State College, ug ACES Polytechnic College, Inc.

Usa kini ka kalihokan o kampanya sa CADAC aron malikay ang mga kabataan sa mga makadaot nga bisyo sama sa droga nga makaguba sa ilang kaugmaon isip mga estudyante ug lumulupyo sa siyudad sa Panabo. Dugang usab kini sa ilang mga kalihokan sa pagpaugnat sa kalawasan aron himsog ug aktibo sa ilang mga gimbuhaton sa eskwelahan ug sa ilang komunidad.

Hugot nga pahimangno ni City Mayor Jose E. Relampagos sa kanunay ilabi na sa mga kabataan nga likayan gayud ang paggamit og droga kay kini makadaot sa pamuyo sa usa ka pamilya.

|Aaron Sumabal, CIO
Photos: Aljun Castilla, CIO Multimedia