Suot ang puti nga toga, kalipay na gisugat sa 89 ka mga PDL (Persons Deprived of Liberty) ang kalampusan sa Elementary ug Junior High School ubos sa programang Alternative Learning System (ALS) adtong August 15, 2022 sa Panabo City District Jail Compound, Barangay Salvacion, Panabo City.

19 ang migradwar sa Elementary ug 70 ang sa Junior High School nga nagpakita og matagbawong kahumanan bisan pa man nga anaa sila sa prisohan. Wala kini nagsilbing babag sa ilang pagkab-ot og katumanan nga makahuman og eskwela.

Nagpaabot og mensahe si City Mayor Jose E. Relampagos, nga dili magmakuli og hatag ang gobyerno og programang pang-kalamboan sa katawhan. “Ang edukasyon mao ang (garbo) sa atong kinabuhi, maoy makausab sa atoa. Remember this day, nigraduate namo so dapat magbag-o na. Tabangan ang kaugalingon nga molambo bahalag ginagmay pa,” sulti pa ni Mayor Relampagos.

Atol sa kalihokan, nagpadayag usab og pagbati ang mga DepEd Panabo ALS implementer na sila Janwario Yamota ug Jaime Carlom sa mga migradwar tungod sa ilahang aktibong pagpakita og pagtuon. Wala usab nagpaulahi si City Jail Warden CINSP Jerry Grace Danao na mopadayag sa iyahang pagpasalamat sa mga tao luyo sa maong katumanan.

Gitapos ang seremonyas sa pagpanghatag og mensahe sa usa ka PDL na si alyas “set”. Matod pa niya nga karon nga higayon lang siya nakasinati og kalampusan sa eskwela, “Sometimes, maglisod ko kay naay mga gipang-answeran sa module na medyo layo sa akong nahibal-an, pero bisan pa man ana, naay nagasuporta sa amoa, naay nagatudlo.”

Nakigduyog sa kalihokan si PMAJ Santos Soriano isip representante ni BJMP-XI Regional Director CSUPT Isabelo Cartin Jr., ALS in charge JO2 Vanessa Amlon, Chief Security & Control SJO4 Hector Ranan, JO1 Gessel Ann Patajo, mga magtutudlo sa ALS, ug uban pang personahe sa BJMP Panabo.

l M. Lagura
Photos: A. Castilla