OPISYAL NANG GIDEKLARA nga Polio Free ang tibook Pilipinas sumala pa sa Department of Health (DOH) nga parehong gikumperma pinaagi sa deklarasyon sa World Health Organization (WHO) sa bulan sa Hunyo 2021.
Sumala pa ni National Immunization Program Coordinator sa Panabo City Health Office nga si Mafel R. Mugas,RN, nga nahimong epektibo ang programa o lakang sa DOH sa siyudad sa Panabo. Dugang pa niya, “Gina-awhag ang tanang ginikanan nga dili kawangon ang oportunidad nga gihatag sa gobyerno sa libreng bakuna.” Di gihapon niya undangon ang pagpahigayon og pagbakuna kontra polio. “Bisan paman nga nagdeklara ang Pilipnas og Polio Free, padayon gihapon ang pagpabakuna batok polio.”
Nagpasalamat usab si City Mayor Jose E.Relampagos sa pagpaningkamot sa mga personahe sa City Health Office lakip na ang mga barangay health workers nga napugngan ang pagkalat sa virus sa siyudad sa Panabo.
Mahinumdoman nga adtong tuig 2019 gideklara sa maong ahensya sa DOH nga adunay “Outbreak” o ang grabeng pagkalat sa Polio Virus. Tungod niini, nagpahigayon og programang Sabayang Patak Kontra Polio adtong Setyembre 2019 hantod tuig 2020 kung asa 11 Million ka kabataan ang nabakunahan gikan sa nagkalain-laing siyudad sa nasod.
| Gen Alforque – CIO
📸 | Emman Pan
