Gisugdan na sa Lokal nga Panggamhanan sa Panabo pinaagi sa Gender and Development (GAD) Office ang pag-organisa og LGBTQ+ Federation alang sa mga miyembro sa LGBTQ+ sa siyudad. Nagpahigayon ang GAD Office og panagpulong alang sa mga presidente sa LGBTQ+ sa matag barangay aron pagahisgutan ang SOGIE Bill ug Republic Act 11313 o “Bawal Bastos” Law aron mahibaloan ang ilang katungod sa komunidad.

Plano ni City Mayor Jose E. Relampagos nga pangusgan ang LGBTQ+ Federation pinaagi sa pagsuporta sa ilang mga kalihokan ug paghatag og pundo alang sa ilang mga proyekto. Gimugna ang paghiusa sa mga LGBTQ+ aron mahatagan sila og livelihood assistance nga mamahimo nilang gamiton sa pagpalambo sa ilang grupo.

Sumala pa ni Executive Assistant ni City Mayor Jose E. Relampagos nga si Jo-Anne R. Capuyan nga importanteng madungog ang tingog sa mga miyembro sa LGBTQ+ tungod nga sila parte sa kumunidad sa Panabo. Ingon pa niya, “Nakita ni Mayor Relampagos ang mga potential sa mga LGBTQ+ community ilabi na ang ilang talento ug kaalam sa daghang butang.”

Subay sa panagpulong, namugna ang interim officers nga mualalay sa pederasyon. napili si Jeffrey Miedes nga taga Barangay New Pandan isip Presidente, si Harley Psychie nga taga Barangay Southern Davao isip Bise-Presidente, Jaykem Celocia nga taga Barangay San Vicente isip Secretary, Roxy Alcordo nga taga Barangay Sto. Niño, Ryle Yecyec nga taga Barangay New Visayas isip Auditor, Bryan T. Almazan nga taga Barangay Gredu isip Business Manager, kauban usab sila Melven S. Bacaling nga taga Barangay Datu Abdul ug ni Archie Espares nga taga Barangay Little Panay isip mga public information Officers.

Matod pa ni Miedes nga dili masukod iyang kalipay tungod opisyal nang namugna ang organisasyon sa inisyatibo ni City Mayor Relampagos. Dungag pa niya, “I am hoping nga mas ma-educate pa nato lalo ang mga miyembro sa LGBTQ+ community ug mas maka-create pa og mga dagkong projects in the future.”

Atol sa Pagpulong, anaa sila Gender and Development Office OIC Libertad V.Regis, Social Welfare Assistant Diane Landero Lamintac, GAD Office personnel Rheva V. Coronel, ug mga LGBTQ+ presidents sa matag barangay.

| Sonny L. Calizar, CIO – PIRO
📸 | Rommel Cayas