Ang Philippine National Police (PNP) sa Panabo City nagpaabot sa ilang serbisyo sa mga katawhan nga nanginahanglan pinaagi sa ilang Barangayanihan Program kauban ang ubang pribadong asosasyon o grupo. Adtong Hunyo 11,2021, gisugdan sa PNP kauban ang United Motorcycle Clubs Of Panabo (UMCP) og pahamtang sa kinabuhi sa pamilya ni Ginang Elyjyn Junsoy, 40 anyos, nga taga Barangay Malativas, pinaagi sa pag-ayos o renovate sa ilang panimalay. Gamit ang pundo sa UMCP, nakapalit sila og materyales nga gikinahanglan para sa kalihokan.

Sumala pa ni Ginang Junsoy, dako og tabang sa iya ang Barangayanihan Program gumikan nga wala silay permanenteng trabaho sa iyang bana aron ma sustena ilang balay. “Wala gyud ko kabalo nga ako ang ilang tabangan. Nagpasalamat usab ko kay dili na salibo og lisod inig mag ulan,” matod pa ni Ginang Junsoy.

Si Rey Norman Villaruz, Presidente sa United Motorcycle Clubs of Panabo, nag-awhag sa ubang grupo nga magtinabangay ug motabang sa gobyerno sa pagpahamtang sa mga programa alang sa katawhan. “This is a way to show other people nga andam mi motabang sa ilaha maskin sa ingon ani na paagi para ma realize (nila) na maskin sa kalisod, naay gyud motabang nila,” dungag pa ni Villaruz.

Ang United Motorcycle Clubs of Panabo usa sa mga Support Advocacy Groups sa PNP Panabo ug Lokal nga Panggamhanan sa Panabo nga mamahimong katambayayong sa pagpahamtang og kalinaw ug kahapsay sa siyudad.

Nahuman ang pag-ayos sa balay adtong Hunyo 16,2021.

| Gen Alforque – CIO
📸 | PNP Panabo & UMCP