Human sa pagkighinabi sa 89th Infantry Makatao Battalion sa RaJOE SERBISYO, sa Dream Radio 94.3 FM, ilang gibutyag nga luwas na ang Davao del Norte sa mga birdugong komunistang terorista nga maoy nakapahadlok sa mga lumulupyo sa probinsya ilabina sa kabukirang dapit.

Kahibaw-an nga sulod sa lima ka dekada mingtumaw ang mga komunistang terorista ug tungod niana aduna silay mga naagni nga mga sibilyan nga maoy hinungdan sa pagpamakak, walay pulos nga mga saad, ug pagkalas sa mga inosenteng kinabuhi, tungod sa maling ideolohiya.

Apan sa hagit ni kanhing Presidente Rodrigo Duterte nga mao ang Anti-Terrorism Act Of 2020 sa Sections 4 ug 12 sa Anti-Terrorism Act nga kung kinsa man nga mga personahe na muhatag og suporta sa mga terorista nga indibidwal o grupo adunay tulubagon ug mag antos sa silot nga pagkakulong nga walay binipisyo sa parol.

Tungod kay nahalikay na kita sa mga terorista, ang mga kasundalohan sa 89th IB ilawom sa Philippine Armed Forces of the Philippines nakahimo og programang Tambayayong sa Kalinaw. Sila naglihok sa paghimo sa maong programa ang Mass Awareness Campaign ug Culture Of Security diin pamaagi aron mapadayon ang pagprebenta sa pagprotekta sa katawhan sa Probinsya.

Nahisgotan ni Corporal Iphraim B. Mission Jr. (Inf) PA ug Corporal Darwin Gumalando sa Alpha Company 89th IB ang pagbisita sa mga tulunghaan sa Siyudad sa Panabo sa ilang kampanya kabahin sa Culture Of Security nga adunay upat ka sumbanan aron ang tanan magmabinantayon nga mao ang Volunteer, Report, Remind ug Participate.

Sa katapusan, naghatag og kasiguraduhan sila Corporal Mission ug Gumalanda sa katawhan sa Panabo na wala nay angay kabalak-an kabahin sa mga terorista ug dasig sila sa ilang mga programa alang sa benepisyo sa katawhan.

✍️Dolly G. Amag, CIO-PIRO