Marso 7,2022 — Opisyal nang nagsugod ang limited Face-to-Face (F2F) classes sa Roxas Elementary School sa Barangay Lower Panaga diin adunay 70 ka mga bata ang misulod sa klase gikan Kinder hantod Grade 3.

Sa pagsugat sa unang adlaw sa mga bata, gihatagan sila og mga school supplies sama sa bag nga adunay sulod papel ug lapis nga kuha sa Maintenance and Other Operational Expenses (MOOE) sa eskwelahan ug ang DepEd Panabo mihatag og Covid supplies sama sa Surgical Mask, Defogging Solution, Alcohol, Tissue, Hand Sanitizer ug uban pa isip suporta ngadto sa Roxas ES.

Mihatag usab ang SK Chairman sa Barangay Lower Panaga nga si Hon. Rio Duyag ug Welyelf Hisula og dugang school supplies nga papel ug lapis, ug adunay libreng arrozcaldo gikan sa God our Savior, Jesus Christ Grace Ministry alang sa mga bata, mga ginikanan ug bisita.

Mipaabot sa iyang pasalamat si School Principal Jonalyn D. Badua sa tanang nagpaluyo nga nakab-ot nila ang tinguha nga makapahigayon sila og F2F classes ug paningkamotan niya kauban ang mga maestra sa Roxas Elementary School nga mapadayon na ang learning modality, blended modular ug F2F classes.

Ingon pa ni Regional Director Allan G. Farnazo, CESO IV nga nalipay siya sa iyang nakitang suporta nga mapahigayon ang F2F classes. “I’m very much happy to the community people and to City Mayor of Panabo,” dugang pa niya. “It takes a village to raise a child.”

Sa maong kalihokan, anaa ang mga personahe sa DepEd Divisison Panabo nga sila Chief CID Janwario E. Yamota, Maria Nenita Tuazon, Luzviminda Dulay ug Michael Neil De Asis sa pag revalidate ug pagmonitor sa kalihokan sa pagsunod sa standard and safety protocols ug ang dakong suporta ni Barangay Captain Renato G. Guardiano.

|I.Balogbog, CIO-PIRO
📸June Geraldo, CIO