Sa gihisgutang “Smoke No More!” sa RaJOE Serbisyo sa 94.3 FM, gibutyag ni City Health Office Anti-Smoking Program Coordinator Anne Michelle Lamban-Fuertes, RN ang mga silot o penalty nga nakasulat sa City Ordinance No. 06-15 nga nagabawal sa pagpanigarilyo sa mga pampublikong lugar, gapanigarilyo nga driver o pasahero sulod sa pampublikong sakyanan, ug ang pagpanigarilyo sa mga government area, ug uban pa. Delikado kini ilabi na sa mga secondhand smokers (SHS) nga mga miyembro sa pamilya o higala nga dili gapanigarilyo.

“As per Department of Health (DOH), ang risk sa secondhand smoker is four times greater than the first smoker tungod wala silay outlet so they just inhale,” ingon ni Fuertes. ” Mas alaot sila kay walay kapagawasan. Igo ra sila musimhot.”

Sa ordinansa, adunay multa nga P500.00-P1,000.00 ngadto sa mga masakpan nga indibidwal nga mosupak sa balaod. Sa ikaduhang higayon nga masakpan, magmulta na og P1,000.00-P5,000.00 apil ang establisyamento nga gipasagdan ang nanigarilyo. Sa ikatulong offense, magbayad na og P5,000.00-P10,000.00, apil ang pagtanggal sa lisensya ang maong establisyamento.

Giklaro ni Fuertes nga ginabawal pud ang paggamit og vape diin ubay-ubay ang gatoo na dili kini delikado. Base sa gipagawas nga datos sa Department of Health (DOH) sa milabay nga katuigan, mas midaghan na ang mga gagamit og vape ilabi na ang mga kabatan-onan.

Sa gipagawas nga Executive Order No. 106 ni President Rodrigo Roa Duterte, iyang gimungkahi ang pagbawal o pag ban sa paggamit ug pag-angkat og vape tungod aduna kini sagol nga “Nicotine”, sobra traynta (30) ka makadaot na kemikal, ug delikado nga metal nga hinungdan sa pagka-adik ug pagkakunhod sa pagdevelop sa utok sa usa ka tao.

Ang RaJOE Serbisyo madunggan sa 94.3 FM ug makita sa City Government of Panabo Facebook Page kada Lunes hantod Biyernes, 8:00 sa buntag.

Sa dugang detalye, paminawa ang full interview: https://www.facebook.com/panabocityofficial/videos/804469876924207

|IDOB