Mayo 18,2021 – Gisugdan na sa City Government of Panabo, pinaagi sa City Health Office, ang pagbakuna og SinoVac sa mga senior citizens sa Panabo Multi-Purpose Gym. Gilaoman nga 3376 ka mga senior citizens sa Panabo City ang mabakunahan base pa sa survey na gibuhat sa health office.

Matod pa ni National Immunization Program Coordinator Mafel R. Mugas, RN nga adunay schedule gihatag kada senior citizen aron adunay crowd control sa venue ug mapatuman ang health protocols sama sa pagsoot og face mask, face shield, ug uban pa. “Kung sila mo anhi na sa venue, magdala sila og tubig ug something makaon aron dili sila magutoman while waiting,” dugang niya.

Aduna sad mga senior citizens nga naga-awhag sa ilang kaubanan sa asosasyon nga magpabukana sama ni Con. Leonilo Guadalquiver, 68 anyos, nga residente sa Barangay Cacao. Ingon pa niya, “Dapat magpabakuna sila para sa kaayohan sa ilang pamilya, sa iyang personalidad ug labaw pa sa safety sa barangay kung asa siya nagpuyo.”

Sa mga gustong magpabakuna nga senior citizen, gi-awhag sila sa health office nga madala og valid ID, QR Code, ballpen, ug magbaon og tubig inomon. “Ang mga Senior Citizens nga gusto magpabakuna na wala pa nalista sa master list, makig-koordinar ug magpalista sa ilang Barangay Health Station aron mahatagan sila og schedule sa pagbakuna.”

Ang mga Senior Citizens mao ang mga naga edad og 60 anyos pataas. Sila ang ikaduhang prayoridad nga mabakunahan sa National Government gumikan nga usa sila sa daling maapektohan sa COVID-19.
Ginalaoman ang kooperasyon sa mga senior citizens alang sa hapsay ug paspas nga pagbakuna ug dili muadto sa venue kung wala pa gihatag nga schedule gikan sa CHO.

|Sonny L. Calizar, CIO – PIRO