Pinalabi ang pagpasalamat sa mga misalmot na Solo Parent sa kada barangay human malampusong giselebrar ang pinakaunang Solo Parents’ Day sa siyudad, adlawng Nobyembre 10, 2022 sa Freedom Gym, Barangay New Pandan, Panabo City.

Tataw sa mga hulagway ang kalipay isip sa pipila ka mga tuig ang milabay, nahatagan na gyud og higayon ang usa sa sektor sa Social Services mao ang Solo Parents. Tungod sa suporta sa Lokal nga Panggamhanan na gipangulohan ni City Mayor Jose E. Relampagos pinaagi sa City Social Welfare and Development Office (CSWDO), napangusgan ang tingog alang kanila.

Ang City Ordinance No. 19-2021 o ang Solo Parents’ Ordinance of Panabo City nagatuki sa paghatag sa mga rehistradong Solo Parents og mga social welfare and development services sama sa livelihood development, counseling, parent effectiveness, educational, medical, employment, ug financial assistance, lakip na ang mga special projects na gikinahanglan og proteksyon.

Sumala pa ni Board Member Hon. Flopone Royle A. Catalan, ang maong nagsulat sa ordinansa kabahin sa Solo Parents’ Act sa siyudad, na ang kalihokan usa ka produkto sa suportang gipadayag sa gobyerno, “Tungod niini, gihatagan kamo og pribilehiyo na madunggan ang inyong hangyo, aron mahatagan mo og pagtagad. Kabalo kong dili lalim mag-inusara og buhi sa inyong mga anak Gusto namo na mahatagan mog katungod na makadawat og mga tabang o serbisyo.”

Atol sa kalihokan, nagpahitabo usab og diskusyon kabahin sa RA 11861 Expanded Solo Parents Welfare Act na gihisgotan ni DSWD Field Office Social Welfare Officer III Sherlyn S. Concubierta. Gitapos ang kasaulogan sa mga kalingawan sama sa Community Dance, Modern Dance Competition, Parlor Games, ug Raffle.

Anaa ang presensya sa kasaulogan nila City Vice Mayor Gregorio Dujali, City Councilors Ian Rolet A. Catalan, Jamail Macla, Social Welfare Officer Melvina A. Domingo, ug uban pang personahe sa CSWDO.

lM. Lagura
Photos: A. Castilla