Girekomenda ang temporaryong pagsirado sa pipila ka mga establishemento tungod sa ilang paglabag sa “No Face Mask, No Face Shield, No Transaction” nga polisiya sa Executive Order No. 26 sa Provincial Government of Davao Del Norte. Gawas sa maong violation, nareport sa Inter-Agency Task Force (IATF) Inspection Team ang paglabag sa physical distancing sulod sa ilang mga pwesto ug ang dili paggamit sa QR code scanning.

Apil sa mga “Recommended for Temporary Closure” ang tindahan sa usa ka general merchandise, duha (2) ka ukay-ukayan, ug mga salon o parloran. Aduna usab mga tindahan sa cellphones ug mga kan-anan. Kung masirado man kini sila, hantod lang sa Hunyo 30,2021 o depende sa pag anunsyo sa bagong Executive Order.

Gawas sa Gaisano Grand Mall of Panabo ug Central Warehouse, gi-inspect usab sa IATF kauban ang mga enforcers ang sulod sa central market ug ang mga stalls sa Premiumed Market (Wet Market).

Subay usab sa City Ordinance No. 62-2020 o ang Mandatory Face Mask Ordinance, gipahinumdom sa IATF Inspection Team ang mga hingtungdan sa mga establishemento nga sila ang maoy manubag kung aduna may makasulod nga customer nga wala nag face mask, lakip na kung walay nakabutang nga “No Face Mask, No Entry” sa entrance.

Ingon pa ni City Administrator Pedrito A.Misoles nga “Ang pagsunod sa health guidelines ug sa executive order makatabang kanato nga mapanaog ang kaso sa COVID-19. Kung magpadayon kamo nga maglabag sa protocol, kamo gyud ang mag atubang sa penalty nga anaa sa atong balaod.”

Sa balaod, gihatagan og awtoridad nga mag-isyu og citation ug notice ang Philippine National Police, Traffic Management Unit, Civil Security Unit, barangay tanods, ug uban law enforcers.

Mensahe ni City Mayor Jose E.Relampagos nga gilaoman niya nga magbangon ang tanan sa nahitabong kalisod nga epekto sa mi aging mga lockdown. Dugang ni Mayor, “Gikinahanglan gyud nato nga makabalik ta og trabaho. Pero gikinahanglan usab namo inyong kooperasyon pinaagi sa pagsunod sa atong health. Magtinabangay kita kay nagbuhat usab kami sa among parte.”

Nagpakanaog pud sa Provincial PNP ang notice kabahin sa mga anaa sa night market ug coastal area. Imbis nga ipasara unta sila, gihangyo ni Mayor Relampagos ang probinsiya nga hatagan og higayon nga ipapadayon ilang operasyon tungod kailangan sila magbawi sa kinabuhian apan striktong ipasunod kanila ang balaod ilawom sa General Community Quarantine.

Ang IATF Inspection Team gilangkoban og mga opisyales ug personahe sa City Administrator’s Office, Philippine National Police, City Health Office, Business Permits and Licensing Section, City Information Office, ug Traffic Management Unit.

Kung aduna may paglabag ang mga establishemento, ereport dayon kini sa PNP sa ilang hotline nga (0907) 312 2991.

| city information office