Enero 26, 2023 — Nagpahigayon og special meeting ang City Cooperative Development Council (CCDC) diin gitambongan sa kwarenta (40) ka miyembro nga kooperatiba sa siyudad sa Panabo sa ABC Function Hall, Barangay New Pandan, Panabo City.

Tinguha niini nga ipasayod ug ipasinati sa tanang miyembro nga kooperatiba sa CCDC ang bag-ohay ra nga mga dugang pamalakad nga iimplementar sa Cooperative Development Authority (CDA). Ang maong government agency maoy gitugyanan nga mokupot ug moregular sa tanang kooperatiba nga nahimugso sa tibook nasud.

Gipangunahan ni Legal Officer Atty. Earl Larroder sa CDA Region XI, ang paghisgot ug pagpasabot kabahin sa unod sa maong balaod alang nga mas magmabinantayon ug mas matinud-anon ang mga opisyales sa mga kooperatiba kabahin sa pagpadagan sa ilahang grupo.

Sa maong kalihokan, anaa si PCGEMPC Chairperson Libertad Villegas-Regis ug Elvie Marie Sollorano-Caro, Senior Cooperatives Development Specialist. Anaa usab si Mr. Arnold Bordios, CDA CDS II, nga nadistino sa Panabo.

| Jetcyrel C. Jaylo, CIO-Research Unit
📷 Q. Villahermosa, CIO-Multimedia