Tungod sa pagsaka sa kaso sa COVID-19 sa siyudad sa Panabo, personal nga gibisita sa Inter-Agency Task Force (IATF) Inspection Team nga gipangulohan ni City Administrator Pedrito A.Misoles ang mga establishemento aron masuta ang mga nagsunod ug nagsupak sa minimum health protocols ilawom sa Executive Order 26 nga gipagawas sa Probinsya sa Davao del Norte.

Gihatagan nila og mga detalyeng impormasyon ang mga manager og staff sa mga stalls sa Gaisano Grand Mall Panabo, Central Warehouse Club, mga salons, ug general merchandise, apil na ang mga negosyo nga anaa sa coastal area, tungod nakita sa Task Force nga ubay-ubay ang wala gasunod sa Physical Distancing ug pag sout og full facemask ug faceshield sa tamang pamaagi.

Atol sa inspeksyon, gihatagan og katungod ang PNP Panabo ug TMU sa pag-isyu og citation sa mga wala nagtuman sa Face Mask Ordinance sa Panabo ug sa Executive Order 26 nga nagpatuman og “No face mask No face shield, no transaction Policy”. Aduna pud pipila ang nahatagan og citation tungod wala nila gisoot og tarong ang face mask.

“Mag igmat ta ug sundon nato ang balaod kay dili lang kini para sa amoa kundi para ni sa atoang mga pamilya nga malikay sila sa COVID-19. Maminaw ug magtinabangay kita,” matod pa ni City Administrator Misoles.

Gawas sa health protocols, gikinahanglan nga matuman ang pag-implementa og QR code scanning sa mga pribado ug pampublikong ahensiya.

Padayon ang pag bisita sa mga myembro sa COVID19- IATF sa mga establishemento aron masiguro nga ni sunod sila sa mga balaod.

Sa inspeksyon, anaa si Acting City Health Officer Dr. Eranie L.Pangilinan, Licensing Officer Juliet Nacario, Information Officer Michael Angelo A.Resueño, ug TMU Leader Alvin Ybañez. Anaa usab ang kapulisan isip representante ni PLTCOL Atty. Verna L.Cabuhat.

| Gen Alforque – CIO