Nahinumdoman nga adtong Hunyo 1,2021, nagpagawas og Executive Order No. 24 si Governor Edwin I.Jubahib nga nagpailawom sa tibook Probinsiya sa Modified General Community Quarantine (MGCQ) base sa national nga Inter Agency Task Force (IATF) on Emerging Infectious Diseases.

Pipila ka adlaw nga nilabay, nakita nga adunay kalit nga pagsaka sa COVID-19 positive cases. Gawas ni ana, adunay nakitang problema sa mga ospital kabahin sa ilang pagdawat og severe cases, labi na katong mga naglisod og ginhawa o “difficulty of breathing”.

Matod pa ni Provincial Administrator Engr. Josie Jean Rabanoz sa iyang interview sa Radio 911 nga sobra 80 ka pasyente ang naa sa waiting list sa DRMC nga kailangan og tubo o ventilator support. Bisan pa man nga nagapasulod ang mga ospital og positive patients, dili pa nila matabangan dayon ang mga bagong severe cases.
Saysay niya, “Atong capacity sa tertiary hospitals in terms sa atong positive patients which requires kanang mga tubo, kanang ventilator, Wala na. Na exhaust nagyud siya.”

Ang mga pasyente nga nanginahanglan og tabang kay mga “severe cases” sa COVID-19 nga nagapaabot pa sa ilang turno sa Davao Regional Medical Center sa Tagum City, “excluding private tertiary hospitals.” Dugang pa ni PA Rabanoz nga mao ni sila ang mga “…severe cases nga naghulat na makasulod sa DRMC para makakuha og oxygen support.”

Tungod sa panghitabo, gipatawag ni Governor Edwin I.Jubahib ang tanang mga mayor sa probinsiya ug ang mga miyembro sa Provincial IATF kauban ang PNP ug AFP aron madesisyonan ang mas striktong kwarantina. Gipakita pa ni PA Rabanoz ang dokumento, nga ilang gipadala sa opisina ni Secretary Carlito Galvez, nga nagapakita sa pagsaka sa kaso sa bulan sa Mayo 2021.

Sa pagpatuman usab sa General Community Quarantine (GCQ) sa probinsiya, gipaningkamotan sa Lokal nga Panggamhanan sa Davao Del Norte ug ang mga LGUs ubos niini nga magpadayon ang Serbisyo sa katawhan lakip na ang pagpugong sa COVID-19.

“Dili pwede ma paralyse ang operations sa government kay kailangan ta maglihok. Dili na lalim ang situation nato karon,” sulti pa ni PA Rabanoz.

Iyang gi-awhag nga magsunod sa polisiya sa GCQ labi na ang minimum health protocols. Dili usa daw magpatapok o mo adto sa mga kalihokan nga maoy mahimong hinungdan nga magtakod ang virus.

Alang sa kompletong interview, eclick ang link nga https://www.facebook.com/PTVDavnor/videos/1799780283516347/

(Photo by: Marvin Recinos)