Suportado na sa Youth Development Section ilawom sa Opisina ni City Mayor Jose E.Relampagos ang Project PUBG (Purok Ugmaron, Basurang-pagkaon Gamiton) sa grupong kabataan nga Cleverbites nga ang tinguha kay moproseso og food waste para gamiton sa gulayan sa kada balay. Kampyonado ang grupong Cleverbites sa pinakaunang Project Proposal Making Contest subay sa pagselebrar sa Linggo ng Kabataan 2021 adtong August 11.

Ilang nakita sa grupo nga tungod nagkadaghan na ang mga community vegetable garden sa matag purok, kinahanglan nga aduna na silay sariling composting facility nga butngan sa food waste. Ingon pa ni Peter Daniel Cael, miyembro sa grupo, “Sa among pagpresenta aning proyekto, gihuna-huna namo nga naay potential makatabang para mabawasan ang food waste ug mapakinabangan pa og usab.”

Wala nagdahom ang Cleverbites nga ilang proyekto maoy mapilian sa mga hurado. Dugang pa ni Cael, “Daghan mi og challenges na among na agian sa pag mugna ani. Kung unsa nga proyekto ang mas gikinahanglan karon sa syudad sa Panabo na makatabang sa kadaghanan”.

Nakuha sa grupong Catalysts of Change ang First Runner-up nga nagmugna og Project YAKAP: “Youth in Action: Key towards Agricultural Progress” samtang Third Place ang Paragas Ki nga nagmugna og “AdhiKAIN: Fish Wastes as Organic Fertilizers for Cost-Efficient Farming Using Aquaponic System.”

Makadawat og P15,000.00 ang Cleverbites, P10,000.00 sa Catalyst of Change, ug P5,000.00 sa Paragas Ki. Ang mga wala midaog makadawat og P2,000.00 nga consolation prizes.

Opisyal na hurado sila National Youth Commission Region XI Cluster Head Mayjee A. Dela Cruz, City Administrator Pedrito A. Misoles, City Budget Officer Joven M. Sepe, City Planning & Development Coordinator Dr. Joseph Raymund A. Sumabal, Provincial Sangguniang Kabataan Federation President Hon. Emerson Dave A. Silutan.

|Ivory Dawn Balogbog, CIO-PIRO
📸| Local Youth Development Section