Hulyo 28, 2021 — Gipahigayon ang opisyal nga pag-abri sa Kadiwa Retail Market (KRM) alang sa Rural Improvement Club Agri-Vendors Association (RICAVA) sa Livestock Auction Center, Barangay Little Panay, Panabo City. Nanguna si City Mayor Jose E.Relampagos sa ribbon cutting kauban si City Agriculturist Dr. Samuel N.Anay ug ni Senior Agriculturist sa Department of Agriculture XI nga si Melinda Rubillano.

Tumong niining Programa nga matabangan ang mga mag-uuma nga mahatagan og bili ang ilang produkto ug mabaligya kini sa ilang lugar. Sumala pa ni City Agriculturist Samuel Anay, “Ang maong programa nagapaningkamot nga mapangitaan og market place ang kada barangay sa Panabo aron dili na kinahanglan moadto paglayo ang mga tao aron mopalit og mga presko ug sustansyado nga mga gulay.”

Gihatagan usab og cash assistance ang proyekto nga mokantidad og Php 50,000.00 gikan sa personal na pundo ni City Mayor Relampagos isip dugang sa kapital. “Dako kaayo og tabang ang gihatag ni mayor kay naglisod mi sa among kapital,” matod pa ni RICAVA President Celsa Dioso. “Amo kining ikumpra dayon og gulay sa among mga miyembro ug dili namo ipahiram.”.

Sumala pa ni Mayor Relampagos nga iyang pangusgan ang livelihood program sa siyudad aron daghan pa ang matabangan nga katawhan. “Andam ko magpailalom sa mga panginahanglan aning mga programang pang-agrikultura aron makatabang sa mga lumulupyo diri sa Panabo,” dugang niya.

Gilaoman nga mapalambo pa sa RICAVA ang ilang gulayan ug paninda.

| Tim Acebedo, CIO-PIRO
📸 | Sonny Calizar, CIO-PIRO