Taliwala sa hagit sa pandemya, nagpadayon gihapon ang pagpakita sa kahanas sa mga partisipante pinaagi sa mural painting. Lain-laing disenyo ang gipasundayag sa matag grupo nga konektado sa pagsaulog sa Binulig Festival sa siyudad.

Nahinumduman nga nagsugod ang MUGNA Binulig: Mural Painting Contest adtong Oktubre 5, 2021 nga nahimutang sa perimeter fence sa City Health Office ug natapos sa adlawng Oktubre 7, 2021 diin gipahitabo ang final judging.

Mao kini ang mga midaog:

1st place- Gemyna Geraldo, Viena Rose Phobe Capirig, Noemie Love Penarada, Korinne Savillaga, ug Joanna Simene.
2nd place- Mary Ann Duropan, Jovit Johnpril Bueno, Darlene Ajoc, ug Cristine Bacasmot.
3rd place- Zyra B. Josol, Reyden Jenn R. Cagata ug Kristine Nicole L. Verrana.

Matod pa ni Gemyna Geraldo, ang mga mag-uuma o mangingisda mao ang ilahang gi-model sa painting. Saysay niya, “Para sa amo sila ang importante sa binulig isip pasalamat kay tungod nakakaon ta tungod nila.”

Nagpasalamat pud si Geraldo kay nagpahigayon og mural painting ang gobyerno, “Tungod ani nga contest, nagawas gyud ang mga artists diri sa Panabo. Unta puhon daghan pag mga events sama ani ang pagahimoon.”

Ang Lokal na Panggamhanan sa Panabo ang nagdumala sa maong kalihokan pinaagi sa City Tourism Promotion Section aron mas mahatagan og pag-ila ang abilidad sa mga kabatan-onan sa pagpinta.

Subay kini sa 9th Binulig Festival sa siyudad nga adunay temang, “Pagpasalamat. Panaghiusa. Pagbarog Luyo sa Pandemya. Panaboans, Duyog ta!”

l M. Lagura
Photos: City Tourism Office /Rommel Cayas