Gisang-at na sa 8th City Council adtong Hunyo 26,2020 ang mga dokumentong gikinahanglan aron matugotan si City Mayor Jose E.Relampagos nga mosulod og kasabotan kauban ang Davao Del Norte State College (DNSC) isip rekwisito para masugdan og pag apod-apod ang mga kagamitan batok sa 2019 Corona Virus Disease sa publiko. Subay kini sa Memorandum Order No. 1 of 2020 sa Commission on Higher Education o CHED Chairman J.Prospero E.De Vera III, DPA nga naga awhag sa mga State Universities and Colleges nga magmugna og mga proyeto batok COVID-19 .

Dakong pasalamat ni Mayor Relampagos sa Davao Del Norte State College President Joy M.Sorrosa, PhD tungod sa pagsupporta sa City Government pinaagi sa proyekto sa DNSC nga “The 3P DNSC COVID-19 Response: Protect, Provide, Promote”. Ingon pa ni Mayor, “Ang pagpaningkamot sa DNSC nga maduso ilang proyekto gikalipay nako kay ilang gihuna-huna ang kaayo sa katawhan luyo sa hulga sa COVID.”

Ang mga kagamitan nga planong ipang apod-apod kay 2000 ka face masks ug face shields, 20,000 packs ka RMS Baby food blend, 6000 packs nga moritos, ug 500 packs nga organic gardening planting materials and equipment.

Sa pag implementa sa programa, ang responsibilidad sa LGU kay ang pagdawat ug pag apod-apod sa kagamitan human pagreport balik sa DNSC sa mga listahan ug litrato sa natagaan. Apan, gikinahanglan pa kini og opisyal nga pagtugot gikan sa 8th City Council isip pamaagi nga masupplementa sa CHED ang mga kagamitan.

Alang sa dugang balita bahin sa proyekto, sunda lang ang City Government of Panabo social media accounts.

| cio