Agosto 30, 2021 – Nagmalampuson ang pagselebrar sa National Heroes Day taliwala sa maulan nga panahon dulot sa Intertropical Convergence Zone. Ang kalihokan inubanan sa suporta sa mga personahe sa Lokal nga Panggamhanan sa Panabo nga gipangulohan ni City Mayor Jose E. Relampagos ug mga miyembro sa 8th City Council (Sangguniang Panlungsod).

Ang National Heroes Day ginapahitabo alang sa pagpasidungog sa kaisog sa mga bayani nga mitabang aron makab-ot sa Pilipino ang kagawasan gikan sa mga mananakop.

Nagsugod ang programa og Entrance of Colors ug Raising of the flag. Naghatag usab si Mayor Relampagos kauban ang mga opisyales sa gobyerno og bulak sa Wreath Offering ceremony. Gisundan usab kini og 21 Gun Salute kauban ang Philippine National Police.

“Every year nagaselebrar ta og Heroes Day, kana atong ihatag sa kaayohan nga ilang nabuhat sa Pilipinas. Ilaha kitang giprotektahan ug gihatagan og liberty,” saysay pa ni City Mayor Jose E. Relampagos. Mando sad niya na magbinantayon alang sa seguridad. “Isip alkalde sa siyudad sa Panabo, akong paningkamotan mahatagan kamo og peaceful na kinabuhi. Kita tanan magkahiusa para hapsay ang Panabo.”

Anaa sa kalihokan si City Administrator Pedrito A. Misoles, mga konsehal, City Government Department Heads, ug mga pangulo sa mga nasyonal na ahensiya sa gobyerno. Naghatag usab og usa ka presentasyon ang mga coach gikan sa AQC Performing Arts Studio.

Gipahitabo ang kalihokan sa Museo Panabo Grounds, City Parks and Plaza, Panabo City.
Alang sa gusto motan-aw sa live viewing, bisitaha ang City Government of Panabo Facebook Page.

|Margot Lagura, CIO PIRO
Photos by: Rommel Cayas