Nagpahigayon ang City Social Welfare and Development Office (CSWDO) og Planning Workshop ug Team Building alang sa mga presidente sa matag barangay sa Panabo City Association of Differently-Abled Person (PCADAP) adtong Oktubre 18, 2021 nga gipahitabo sa City Hall of Panabo Function Hall.

Tumong sa maong aktibidades kay aron masayran ang mga mulo sa matag PCADAP ug kung unsay mga pamaagi nga puwede nilang himuon aron molambo pa sila sa ilang mga kinabuhi bisan pa sa kalisod sa ilang kahimtang o ang Empowerment alang kanila.

Gihisgutan dinhi ang mga kanunay ng mga problema nga ilang ginatubang isip usa ka miyembro sa Persons with Disability (PWD). Diskriminasyon ug pagsalikway ang duha ka mga babag nga kanunay mabati sa mga PWD. Sumala pa sa guest speaker sa maong aktibidadis, nga gikan sa Provincial Social Welfare and Development Office (PWDO) nga si Jucelyn C. Lumangtad nga divided house cannot stand, maong ginapaningkamotan sa mga opisyales nga matabangan ang mga PWD hilabi na ang PCADAP. Dugang pa niya, “The mind and heart work, naay strength maskin PWD.”

Ingon pa ni Allan Gallve nga presidente sa PWD sa Barangay. San Francisco nga dako iyang kalipay kay suportado sila sa ilahang barangay hilabi na sa lokal nga panggamhanan. Dugang pa niya, “Wala mi gahulat lang kung naay tabang moabot, nagpakabana usab kami nga moingon samong mga kinahanglan ug dako akong kalipay kay si Mayor Relampagos kauban ang mga opisyales sa among Barangay ginatabangan mi.”

Anaa sa team building sila si Assistant City Administrator Brenda A. Sauping isip representante ni City Mayor Jose E. Relampagos, CSWDO Department Head Chareina Joy G. Lacuin, Disability Affairs Officer I Myla Villa M. Aquino, Social Welfare Officer I Juvelyn C. Alamban, ug Shanel Q. Gutierrez.

| Tim Acebedo, CIO-PIRO
📸 | Quinn Villahermosa, CIO-MULTIMEDIA