Oktubre 20, 2021 – Nagpakitang-gilas sa cultural presentation ang Tribung Bagobo sa Barangay Maduao ug Tribung Sama sa Barangay Upper Licanan sa ilang panag-indigay sa Lutong Tribu, Sayaw sa Tribu, ug Tribung kasuotan.

Katuyoan sa kalihokan ang magbalik-lantaw sa gipreserba nga kultura kabahin sa sayaw, luto, kasuotan ug lakip niini ang pagpadayon nga paghatag og lig-on na pag-ila sa ilaha isip usa ka mga miyembro sa lain-laing tribu. Subay ang panghitabo sa ika-Napulo (10) nga tuig nga pagselebrar sa Buwan ng Tribu sa siyudad na adunay temang, “Kasadya sa Tribu, Taliwala sa Pandemya.”

Gibutyag ni Emillia A. Dela Peña, usa ka partisipante gikan sa tribung Sama sa Barangay Quezon, nga nalipay siya kay bisan pa man adunay pandemya, nagpahigayon gihapon og kalihokan atol sa selebrasyon ang gobyerno. Naghatag usab siya og mensahe sa iyang isig ka mga tribu nga nag-awhag nga dili dapat sila mahadlok ug maulaw mugawas. “Dili ta maulaw isip mga tribu. Magpaila ta kay aduna kitay balaod ug katungod sa katilingban,” dugang niya.

Mapasalamaton si City Tribal Chieftain Merlinda B. Aranar sa mga tao luyo sa katumanan ilabina sa Lokal nga Panggamhanan. Ingon niya, “Dakong pagtimbaya nako kay City Mayor Jose E. Relampagos ug sa iyang mga kaubanan kay gihatagan mi og pagtagad ug wala sa pagduha-duha wala gyud nibalibad sa among hangyo.”

Anaa sa programa ang mga personahe sa National Commission of Indigenous Peoples-Davao Del Norte (NCIP) Michelle Aquino, Arnel Miangkas, City Youth Development Office Head Reynard C. Engada, ug mga Indigenous People (IP) Leaders.

Laoman nga ugma, Oktubre 21, 2021, ipadayon ang kasaulogan sa Buwan ng Tribu adto sa mga Barangay Sindaton alang sa Tribung Mandaya ug Tribung Ata-Manobo adto sa Barangay Lower Panaga.

l M. Lagura
Photos: Q. Villahermosa